އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެ ކަން އިއުލާން ކުރައްވާފައިވާ, ރައީސް އިބްރާހިމް މުހައްމަދު ޞާލިހް އެމްޑީޕީގެ މާލޭ މެންބަރުންނާއި މިރޭ ބައްދަލު ކުރައްވާ ގޮތަށް ހަމަޖެހިއްޖެއެވެ.
ރައީސް ޞާލިހްގެ ކެމްޕެއިން ޓީމުގެ ތަރުޖަމާނު، އަދި ޑިފެންސް މިނިސްޓަރު މާރިޔާ އަހުމަދު ދީދީ ކުރެއްވި ޓްވީޓެއްގައި ވިދާޅުވީ، ރައީސް ޞާލިހު ގެ ޕްރައިމަރީ ކެންޕެއިންގެ "މާލޭ ބައްދަލުވުން" މިރޭ 8:30 ގައި ދަރުބާރުގޭ ފާށަނާ މާލަމުގައި އޮންނާނެ ކަމަށެވެ.
އަދި މި ބައްދަލުވުމުގައި އެމްޑީޕީގެ މާލޭ ދާއިރާގެ މެންބަރުންނާއި، ކެންޕެއިން ޓީމުތަކާއި ރައީސް ޞާލިހު ބައްދަލުކުރެއްވުމަށް ހަމަޖެހިފައިވާ ކަމަށްވެސް މާރިޔާ ވިދާޅުވިއެވެ.
ރައީސް ޞާލިހުގެ އެމްޑީޕީ ޕްރައިމަރީގެ ކެމްޕެއިން ތެރެއިން އަތޮޅުތަކުގެ ދަތުރުތައް މިހާރު ފައްޓަވާފައިވާ އިރު އެމަނިކުފާނު އެންމެ ފުރަތަަމަ ވަޑައިގެންނެވީ ރ އަތޮޅަށެވެ.
އެއަށްފަހު، ޅ، ބ އަދި ނ އަތޮޅުގެ ބައެއް ރަށްތަކަށްވެސް ވަޑައިގެންފައިވާއިރު، އެ އަތޮޅު ތަކުގައި ބޭއްވި ޖަލްސާ ތަކުގައި އެމަނިކުފާނު ވަނީ އެ އަތޮޅުގެ ރަށްތަކަށް ގިނަ ކަންކަން މި އަހަރު ތެރޭގައި ކޮށްދެއްވާނެ ކަމަށްވެސް ވައުދުވެ ވަޑައިގެންފައެވެ.
Advertisement
This content is created and paid for by advertisers and does not involve Voice Journalists
