ދ. ކުޑަހުވަދޫގައި 50 ހައުސިން ޔުނިޓް ޢިމާރާތް ކޮށްދޭން ޝައުގުވެރިވާ ފަރާތްތަކުން އެކަމަށް ކުރިމަތިލުމުގެ ފުރުސަތު ހުޅުވާލައިފިއެވެ.

ފިނޭންސް މިނިސްޓްރީން ކުރި އިއުލާނެއްގައި ބުނީ، ކުޑަހުވަދޫގައި ޑިޒައިން އެންޑް ބިލްޑް އުސޫލުން ހައުސިން ޔުނިޓްތައް އިމާރާތްކޮށްދޭން ބޭނުންވާ ފަރާތްތަކަށް އެ ފުރުސަތު ހުޅުވާލާފައިވާ ކަމަށެވެ. ބިޑްތައް ހުޅުވުން އޮންނާނީ ފެބްރުއަރީ 14 ވަނަ ދުވަހު އެވެ.

އަދި މި ބީލަމުގައި ބައިވެރިވުމަށް -/500 ރުފިޔާ (ފަސްސަތޭކަ ރުފިޔާ) ގެ ނޮން-ރިފަންޑަބަލް ރަޖިސްޓްރޭޝަން ފީއެއް ދައްކަންޖެހޭއިރު، މި މަޝްރޫއުގެ ބިޑްސެކިއުރިޓީގެ ގޮތުގައި -/260,000ރ (ދެލައްކަ ފަސްދޮޅަސް ހާސް ރުފިޔާ) ހުށަހަޅަން ޖެހެއެވެ. ބިޑް ސެކިޔުރިޓީގެ މުއްދަތަކީ ބިޑް ހުޅުވާ ތާރީހުން ފެށިގެން 148 ދުވަހެވެ. 

މިއަހަރުގެ ބަޖެޓްގައި ހިމަނައިގެން ކުރިޔަށް ގެންދިޔުމަށް ނިންމާފައިވާ މި މަޝްރޫއަށް 9.2 މިލިއަން ރުފިޔާ ވަނީ ކަނޑައަޅާފައެވެ.

ކުޑަހުވަދޫގެ އިތުރުން ފުވައްމުލައް ސިޓީގައި 400 ހައުސިން ޔުނިޓް އަދި ށ.ކޮމަންޑޫގައި 30 ހައުސިން ޔުނިޓް އަޅާނެ ބަޔަކު ހޯދަން ސަރުކާރުން ވަނީ އިއުލާންކޮށްފަ އެވެ.