އެއްވެސް ސަރުކާރަކުން ނުހިންގާ ވަރުގެ ބޯހިޔާވަހިކަމުގެ މަޝްރޫއެއް ފަށައިގެން ސަރުކާރުން ކުރިއަށް ގެންދާ ކަމަށާ، އަދި މާލޭގެ އެއްވެސް ރައްޔިތެއް ބާކީ ނުކޮށް ފުލެޓާއި ގޯތި ދޭނެ ކަމަށް ރައީސުލް ޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމްޑީޕީގެ ޕްރައިމަރީގެ ކެމްޕެއިންގައި ރޭ ދަރުބާރުގޭގައި ބޭއްވި ބައްދަލުވުމުގައި ރައީސް ސޯލިހް ވިދާޅުވީ މާލޭ ރައްޔިތުންނަށް ހާއްސަކޮށްގެން 7000 ފްލެޓާއި 5000 ގޯތި ދިނުމުގެ މަޝްރޫއު މިހާރުވެސް ކުރިއަށްދާ ކަމަށެވެ. އަދި މާލޭ ރައްޔިތުންގެ ބޯހިހާވަހިކަމުގެ ވާހަކައަކީ ވޯޓް ހޯދުމަށް އޮޅުވާލައިގެން ދައްކާވާހަކަ ނޫންކަމަށެވެ.

"މާލެއަށް ހާއްސަކޮށްގެން 7000 އެތައް ފުލެޓަކާއި 5000 ގޯތި ދިނުމުގެ މަޝްރޫއު އެދަނީކުރިއަށް. ތިބޭފުޅުން ގަބޫލުކުރައްވާ އަޅުގަނޑު މިދައްކާ ވާހަކަ. މިއީ އޮޅުވާލައިގެން ވޯޓް ހޯދަން ދައްކާވާހަކައެއް ނޫން. ވޯޓަކާއި މިކަމަކާއި ނެތް ގުޅުމެއް. އިރާދަކުރެއްވިއްޔާ މިއަހަރުގެ މެދަށް އަންނަ އިރުގައި އަޅުގަނޑުއެވީ ވައުދާ އެއްގޮތައް މާލޭ ރައްޔިތުނަށް ގޯތި ކަނޑާފައި ދޭނަން" ރައީސް ވިދާޅުވިއެވެ.

Advertisement

ރައީސް ވިދާޅުވީ އެމަޝްރޫއުގެ އިވެލުއޭޝަންގެ މަސައްކަތް މިހާރު ޕްލޭނިންގެ މިނިސްޓާރީން ކުރަމުން އަންނަ ކަމަށާ އެމަސައްކަތް ވީހާވެސް ރަނގަޅަށް ކުރާނެކަމަށެވެ. އަދި ފްލެޓާއި ގޯއްޗައް ޝަރުތު ހަމަވާ އެއްވެސް މީހަކު އެކަމުން ބާކީނުކުރާނެކަމަށާއި ޝަރުތު ހަމަވާ އެންމެނަށްވެސް ގޯއްޗާއި ފްލެޓް ދޭނެ ކަމަށްވެސް އެމަނިކުފާނު ވިދާޅުވި އެވެ. 

މިއާއެކު މީގެ ކުރިން އައި އެއްވެސް ސަރުކާރަކުން ބޯހިޔާވަހިކަމުގެ މަޝްރޫއެއް ފަށާފައި ފްލެޓް ހަވާލު ކުރެވުނުތޯ ސުވާލު ކުރައްވައި އެމަނިކުފާނު ވަނީ އެހެން އެއްވެސް ބޭފުޅަކު ފުލެޓުގެ ވާހަކަ ނުދެއްކެވުމަށް އެދިވަޑައިގެންފަ އެވެ. 

"މި ވޭތުވެދިޔަ ތަނުގައި ކޮން ސަރުކާރަކަށްތޯ ބޯހިޔާވަހިކަމުގެ މަޝްރޫއެއް ފަށާފައި ފްލެޓް ހަވާލު ކުރެވުނީ؟ ނޯންނާނެ. ނަމަވެސް އިރާދަކުރެއްވިއްޔާ މި ސަރުކާރުން އަޅަން ފެށި ފްލެޓުތަކުގެ މަސައްކަތް ނިންމައި އެ ފްލެޓްތަކުގައި މާލޭގައި ފްލެޓަށް ބޭނުންވެފައި ތިބި ރައްޔިތުންނަށް ވަންނަން ފެށޭ ވަރު މި އަހަރުގެ ތެރޭގައި އަޅުގަނޑުމެން ކުރާނަން،" ރައީސް ޞާލިހު ވިދާޅުވިއެވެ. 

ރައީސްގެ ޕްރައިމަރީގެ ކެމްޕެއިން ތެރެއިން މީގެ ކުރިންވެސް ބޭއްވި ޖަލްސާގައި އެމަނިކުފާނު ވަނީ މާލެ ސަރަހައްދުގައި މި ސަރުކާރުން ފެށި ބައެއް ފްލެޓުތަކުގެ މަސައްކަތް ނިންމައި މި ފަސް އަހަރުގެ ތެރޭގައި މީހުން ދިރިއުޅެން ފެށޭވަރުކޮށް ދެއްވާނެ ކަމަށް ވިދާޅުވެފައެވެ.