ހދ. ހަނިމާދޫ އެއާޕޯޓުގެ އަމަލީ މަސައްކަތް ފަށާ ދުވަހަށް ރައީސުލް ޖުމްހޫރިއްޔާ އިބްރާހިމް މުޙައްމަދު ޞާލިހު އެރަށަށް ވަޑައިގަންނަވަށް ހަމަޖައްސައިފިއެވެ.

އަންނަ އަންގާރަ ދުވަހު ރަައީސް ޞާލިހު ހަނިމާދުއަށް ވަޑައިގަންނަވަން ހަމަޖެހިފައި ވާއިރު، އެއީ އެރަށު އެއާޕޯޓު މަސައްކަތް ފަށާ ދުވަހެވެ.

އެއާޕޯޓްގެ މަސައްކަތް ފެށުމުގެ ރަސްމިއްޔާތު ކުލަގަދަކޮށް ފާހަގަކުރުމަށް ހަނިމާދޫ ކައުންސިލުން ދަނީ ތައްޔާރު ވަމުންނެވެ.

ހަނިމާދޫ އިންޓަނޭޝަނަލް އެއާޕޯޓު ތަރައްގީ ކުރުމުގެ ބޮޑު މަޝްރޫއުގައި ދިވެހި ސަރުކާރާއި އިންޑިއާގެ ކުންފުންޏަކާ ދެމެދު އެއްބަސްވުމުގައި ސޮއިކުރީ މިދިޔަ އަހަރުގެ ސެޕްޓެމްބަރު މަހުގެ ތެރޭގައެވެ.

މި މަޝްރޫއުގެ މަސައްކަތް، އިންޑިއާގެ ޖޭއެމްސީ ޕްރޮޖެކްޓްސްއާ ހަވާލު ކުރީ 136.6 މިލިއަން ޑޮލަރު (2.1 ބިލިއަން ރުފިޔާ)އަށެވެ.

ޖޭއެމްސީ ކުންފުންޏަކީ އިމާރާތްކުރުމުގެ ދާއިރާ އާއި ހަކަތައިގެ ދާއިރާގެ ބޮޑެތި މަޝްރޫއުތައް ހިންގާ އިންޑިއާގެ ބޮޑު އިންފްރާސްޓްރަކްޗާ ކުންފުންޏެކެވެ.

މި މަޝްރޫއުގެ މަސައްކަތް ނިންމައި 2024ގައި އެއާޕޯޓުން ހިދުމަތް ދޭން ފަށަން ހަމަޖެހިފަވާ ކަމަށް އިކޮނޮމިކް މިނިސްޓްރީން މީގެ ކުރިން ވަނީ ވިދާޅުވެފައެވެ. މި މަޝްރޫއުގެ ދަށުން ހަނިމާދޫ އެއާޕޯޓުގައި 2.46 ކިލޯމީޓަރުގެ އާ ރަންވޭއެއް ގާއިމްކުރާނެ އެވެ.