ކުރިއަށް އޮތް ރިޔާސީ އިންތިޚާބުގައި އެމްޑީޕީގެ ރިޔާސީ ޓިކެޓު ދޭންވީ ގައުމު ތަރައްގީ ކޮށްދީ، އެ ތަރައްގީ ދަމަހައްޓާނެ ލީޑަރަކަށް ކަމަށް ރައްޔިތުންގެ މަޖިލީހުގެ ފޭދޫ ދާއިރާގެ މެމްބަރު މުހައްމަދު ނިހާދު ވިދާޅުވެއްޖެ އެވެ. 

އެމްޑީޕީގެ ރިޔާސީ ޕްރައިމަރީގައި ޕާޓީގެ ދެ ރައީސުން ވާދަކުރައްވާއިރު، މިއީ އެމްޑީޕީގެ ކުރިމަގު ބިނާކުރާނެ އިންތިޚާބެއްކަމަށް ޕާޓިގެ އިސް ސަފުގައި ތިއްބަވާ ފަރާތްތައް އިއްތިފާގުވެއެވެ. އެއީ ދެ ރައީސުން ގެންގުޅުއްވާ ސިޔާސަތުތަކާއި ވިސްނުންފުޅު ތަފާތުވުމާއި ގުޅިގެންނެވެ. 

އިންތިޚާބާއި ގުޅިގެން ފޯރިގަދަ ކެމްޕޭނެއް ކުރިއަށް ދާއިރު، ދެ ރައީސުންގެ ފަހަތްޕުޅުގައި ޕާޓީގެ މެމްބަރުން ބެހިފައިވާކަން ފާހަގަކޮށްލެވެއެވެ. 

Advertisement

ނިހާދަކީ މި އިންތިޚާބުގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް ތާއީދުކުރައްވާ ބޭފުޅެކެވެ. 

އެމްޑީޕީގެ ރިޔާސީ ޓިކެޓު ރައީސް ސޯލިހަށް ދެއްވުމަށް އެމްޑީޕީގެ މެމްބަރުންގެ ކިބައިން އެދިވަޑައިގަންނަވަމުން ނިހާދު ވިދާޅުވީ ރައީސް ނަޝީދު ދެކެ އެމްޑީޕީގެ މެމްބަރުން ލޯބި ވި ނަމަވެސް ކުރިއަށް އޮތް އިންތިޚާބުގައި ވޯޓުދެއްވަންވީ ތަރައްގީ ދަމެހެއްޓޭނެ ބޭފުޅަކަށް ކަމަށެވެ. 

އެމްޑީޕީ އިސްވެ އޮވެ ހިންގާ ކޯލިޝަން ސަރުކާރަކީ ހެޔޮ ވެރިކަމެއް ކަމަށާއި، މި ވެރިކަން ދެމެހެއްޓުން މުހިންމުކަމަށް ނިހާދު ވިދާޅުވިއެވެ. އަދި މި ވެރިކަން ދެމެހެއްޓޭނެ ގޮތަކަށް އެއްމޑީޕީގެ މެމްބަރުން ރިޔާސީ ޕްރއިމަރީގައި ގޮތް ނިންމެވުމަށް ނިހާދު ވަނީ އެދިވަޑައިގެންފައެވެ. 

ރައީސް ސޯލިހަށް ތާއީދުކުރައްވާ މެމްބަރުން ވިދާޅުވަމުންދަނީ އެމްޑީޕީއަށް ވެރިކަން ދެމެހެއްޓޭނެ ހަމައެކަނި ފޯމިއުލާއަކީ ކޯލިޝަންއެއް ހެދުންކަމަށެވެ. އަދި މިހާރު ރާއްޖޭގައި އޮތް އެއްވެސް ސިޔާސީ ޕާޓީއަކުން ރައީސް ނަޝީދާއެކު ކޯލިޝަން ހަދަން ބޭނުން ނުވާނެކަމަށް އެ މެމްބަރުން ގެންދަވަނީ ތަކުރާރުކޮށް ވިދާޅުވަމުން ނެވެ.