މާލޭ ރަސްމީ ފާލަމާ 3 ނަންބަރު ޖެޓީއާ ދެމެދު ފަޅުތެރެއަށް ކަޅުތެޔޮ އެޅެން ދިމާވި ސަބަބު ހޯދުމަށް ސާމްޕަލްނަގައިފިއެވެ.

"ވޮއިސް" އަށް މައުލޫމާތު ދެއްވަމުން އެންވަޔަރުމަންޓު ޕްރޮޓެކްޝަން އޮތޯރިޓީ (އީޕީއޭ)ގެ ޑިރެކްޓަރ ޖެނަރަލް އިބްރާހިމް ނައީމް ވިދާޅުވީ ކަޅުތެޔޮ އެޅުނު ސަބަބު ދެނެގަތުމަށް، މިދިޔަ ބުރާސްފަތި ދުވަހު ސާމްޕަލް ނަގާފައިވާ ކަމަށެވެ. އަދި ސާމްޕަލް އެނަލައިޒް ކުރުމުގެ މަސައްކަތް ސަރުކާރުން ކުރަމުންދާ ކަމަށެވެ.

"ސާމްޕަލް ނެގީ ފަޅުތެރެއިންނާ ބަނދަރުގަ ހުރި ބޯޓު ބޯޓުން،" ނައީމް ވިދާޅުވިއެވެ.

Advertisement

ސާމްޕަލް އެނަލައިޒް ކުރުމުގައި، ރާއްޖެއިން ހެދެން ހުރި ޓެސްޓުތައް ހަދާނީ ރާއްޖޭގައި ކަމަށާއި އަދި ރާއްޖެއިން ހެދެން ނެތް ޓެސްޓުތައް، ބޭރަށް ފޮނުވައިގެން ހަދާނެ ކަމަށް ނައީމް ވިދާޅުވިއެވެ.

އެމްއެންޑީއެފްއިން މީގެ ކުރިން ބުނެފައިވާ ގޮތުގައި، އެ ސަރަހައްދަށް 1000 ލިޓަރުގެ ތެޔޮ އެޅިފައި ހުއްޓެވެ.

އެކަމާއި ގުޅޭގޮތުން އީޕީއޭގެ ޑިރެކްޓަރު އިބްރާހިމް ނައީމު މީގެ ކުރިން ވިދާޅުވީ ތެޔޮ އެޅެން ދިމާވި ސަބަބު މިހާތަނަށް ދެނެގަނެވިފައި ނުވާކަމަށެވެ. އެހެން ނަމަވެސް އެކަން ބަލަމުންދާކަމަށް އޭނާ ވިދާޅުވިއެވެ. 

އޭގެ އިތުރުން ނައީމު ވިދާޅުވީ ފަޅުތެރެއަށް ތެޔޮ އެޅުމާއި ގުޅިގެން އެ ސަރަހައްދުގައި އެއްވެސް ދިރުމަކަށް ގެއްލުމެއް ލިބިފައިވާކަން އަދި ފާހަގަކުރެވިފައި ނުވާކަމަށެވެ. 

ހެވީ ފިއުލް އޮއިލްއަކީ އާގު ބޯޓް ފަހަރު ފަދަ ބޮޑެތި ބޯޓްތަކުގައި ބޭނުންކުރާ ތެލުގެ ބާވަތެކެވެ. އީޕީއޭއިން ބުނީ، އެކަން ހިނގައިދިޔަ ގޮތް ބަލަމުންދާކަމަށާއި، އެއްވެސް ގެއްލުމެއް ލިބިފައިވާނަމަ އެކަން ދިރާސާ ކުރުމަށްފަހު ހާމަކުރައްވާނެކަމަށެވެ.