ގާނޫނު ބަދަލުކޮށްގެންވެސް ވެރިކަމަށް އަންނަން އުޅެނީ ކާކުކަން އެންމެނަށްވެސް އެނގޭ ކަމަށް ވިދާޅުވެ ރައީސް އިބްރާހިމް މުހައްމަދު ޞާލިހުގެ ހޫނު ރައްދު ތަކެއް، ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދަށް އަމާޒުކުރައްވައިފިއެވެ.  

އެމްޑީޕީގެ ރިޔާސީ ޕްރައިމަރީގެ ކެމްޕެއިންގައި، ބ. ހިތާދުއަށް ވަޑައިގެން އެރަށުގައި ތިއްބެވި ރައީސް ނަޝީދުގެ ސަޕޯޓަރުންނާ މުހާތަބު ކުރައްވައި ވާހަކަ ދައްކަވަމުން، 2018 ވަނަ އަހަރުގެ ރިޔާސީ އިންތިހާބަށް އެމްޑީޕީން ރައީސް ސޯލިހު ނެރުނީ 18 މަސް ދުވަހުގެ މުއްދަތަށް ވެރިކަން ކުރައްވާގޮތަށް ކަމަށާއި އެވާހަކަ އެމްޑީޕީގެ މެނިފެސްޓޯގައިވެސް ލިޔެފައިވާނެ ކަމަށް ނަޝީދު ވަނީ ވިދާޅުވެފަ އެވެ.

ނަމަވެސް ރައީސް ނަޝީދު ވިދާޅުވީ، 18 މަސްދުވަހުގެ މުއްދަތަކަށް ވެރިކަމަށް ގެންނެވުމުން، ވެރިކަމުގެ ފުރަތަމަ ދައުރު ފުރިހަމަ ކުރައްވައި ރައީސް ސޯލިހު ގެންދަވަނީ ދެވަނަ ދައުރެއްގެ ވާހަކަ ދައްކަވަމުން ކަމަށެވެ. އަދި ދެވަނަ ދައުރު ނިންމަވައިފައި ގާނޫނުއަސާސީ ބަދަލު ކުރައްވައި ވެރިކަމުގެ ތިންވަނަ ދައުރެއްގެ ވާހަކަ އެމަނިކުފާނު ދައްކަވާނެ ކަމަށްވެސް ވިދާޅުވިއެވެ.

ނަޝީދުގެ އެވާހަކަ ތަކާއި ގުޅިގެން، ރޭ ހުޅުމާލޭގައި އޮތް ރައީސް ޞާލިހުގެ ކެންޕެއިން ބައްދަލުވުމުގައި ވާހަކަ ދައްކަމުން ރައީސް ޞާލިހް ވަނީ ރައީސް ނަޝީދު ބަރުލަމާނީ ނިޒާމަކަށް ތާއީދު ކުރައްވާއިރު، ރިޔާސީ އިންތިހާބެއްގައި ބައިވެރި ވީތީ އެކަމަށްވެސް ފާޑުވިދާޅުވެފައެވެ. 

އެގޮތުން، ވިދާޅުވީ، އެމަނިކުފާނު ވެރިކަމުގެ ދެވަނަ ދައުރަކަށް ކުރިމަތިލެއްވީ ރިޔާސީ ނިޒާމަކަށް ތާއީދު ވެސް ކުރައްވާތީ ކަމަށެވެ. އަދި ވެރިކަން ބޭނުންވެގެން އަބަދު އުޅުއްވަނީ ކޮން ބޭފުޅެއް ކަން ދިވެހި ރައްޔިތުންނަށް އެނގޭނެ ކަމަށާ އެކަމާއިމެދު އެމްޑީޕީގެ ޕްރައިމަރީގައި ވޯޓުލާ ބޭފުޅުން ވަރަށް ރަނގަޅަށް ވިސްނުމަށް ރައީސް އެދިވަޑައިގެންނެވި އެވެ.

"ވެރިކަން ވެރިކަން ވެރިކަން ނޫން އެއްޗެއް ނެތް. ނިޒާމް ބަދަލުކޮށްގެން ވިޔަސް ގާނޫނުއަސާސީ އިސްލާހުކޮށްގެން ވިޔަސް ވެރިކަމަށް އަންނަނީ ކޮން ބޭފުޅެއްތޯ ހުރިހާ ބޭފުޅުންނަށް އެނގިވަޑައިގަންނަވާނެ،" ނަޝީދުގެ ނަން ވިދާޅުވެ ރައީސް ވިދާޅުވި އެވެ.

މިއާއެކު ރައީސް ޞާލިހް ވިދާޅުވީ، ރިޔާސީ އިންތިހާބެއްގައި އޮންނަނީ ދެ ދައުރު ކަމަށާއި އެ އަށް ވުރެ އިތުރަށް ކުރިމަތިލާން ގަސްތުނުކުރައްވާ ކަމަށް ރައީސް ވިދާޅުވި އެވެ.

ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދާ، ދެ ބޭފުޅުންގެ މެދުގައި ރިޔާސީ ޕްރައިމަރީގެ ވާދަވެރިކަން ބޮޑުވެ، އެ ވާދަވެރިކަމުގެ ތެރެއިން ރައީސް ނަޝީދާއި ރައީސް ޞާލިހް އަންނަނީ އެއްބޭފުޅަކު އަނެއް ބޭފުޅަށް ވަރަށް ބޮޑަށް ފާޑު ވިދާޅުވަމުންނެވެ.