އެމްޑީޕީ އަކީ ފިކުރެއް ނަމަވެސް އެއީ ވަކި މީހަކު އަނބުރާ ފިކުރެއް ނޫން ކަމަށާ، އެ ފިކުރު ނައްތާލީވެސް އެމްޑީޕީން ކަމަށް ރައްޔިތުންގެ މަޖިލީހުގެ ހުޅުމާލޭ ދާއިރާގެ މެންބަރު ޢަލީ ނިޔާޒު ވިދާޅުވެއްޖެއެވެ.
ނިޔާޒު މިފަދައިން ވިދާޅުވީ ރޭ ހުޅުމާލޭގައި ބޭއްވުނު ރައީސް އިބްރާހިމް މުހައްމަދު ޞާލިހުގެ ކެންޕެއިން ބައްދަލުވުމުގައި ވާހަކަ ދައްކަވަމުންނެވެ.
އެ ބައްދަލުވުމުގައި ވާހަކަ ދައްކަވަމުން ނިޔާޒު ވަނީ، ޕްރައިމަރީގައި ރައީސް ޞާލިހާއި ވާދަކުރައްވާ އެމްޑީޕީގެ ރައީސް މުހައްމަދު ނަޝީދުގެ ކެންޕެއިންގައި އެމަނިކުފާނަކީ "ފިކުރެއްގެ ދިރުން" ވިދާޅުވެ، އެމްޑީޕީގެ ފިކުރަކީ ރައީސް ނަޝީދު ގެ ފިކުރު ކަމަށް ދެއްކުމަށްޓަކައި އެމަނިކުފާނުގެ ޓީމުން ވިދާޅުވަމުން އަންނާތީ އެކަމަށް ވަރަށް ބޮޑަށް ފާޑުވިދާޅުވެފައެވެ.
"ރަނގަޅު ތެދެއް. އެމްޑީޕީ އަކީ ފިކުރެއް. އެ ފިކުރަކީ ޖާޒީރާ ރާއްޖެ ފިކުރު. އެ ފިކުރަކީ ކުރިއަށްދާ ފިކުރު. އެ ފިކުރަކީ ނުހުއްޓި ތިބޭ ފިކުރު. އެ ފިކުރަކީ ވަކި މީހަކު އަނބުރާ ފިކުރެއް ނޫން. އެ ފިކުރު އަޅުގަނޑުމެން ނައްތާލައިފިން." ނިޔާޒު ވިދާޅުވި އެވެ.
ނިޔާޒު ވިދާޅުވީ 30 އަހަރު ވަންދެން އެކަކު ވެރިކަން ކުރުމަކީ ގަބޫލު ކުރެވޭ ފިކުރެއް ނޫން ކަމަށާ، މަގު މައްޗަށް ނުކުމެގެން އެ ފިކުރު އެމްޑީޕީން ބަދަލު ކުރީ އެއީ ގަބޫލު ކުރެވޭ ވެރިކަން ކުރުމުގެ ނިޒާމެއް ނޫންވީމާ ކަމަށެވެ.
އަދި އެކަމަށްޓަކައި އެމްޑީޕީ އުފެދިގެން އައި ކަމަށާ، ސިޔާސީ ޕާޓީތަކުގެވެސް ލީޑަރުން ބަދަލު ވާނެ ކަމަށާ، ޕާޓީތަކުގެ އިސްކޮށް ތިއްބަވާނީ އެކިފަހަރު އެކި ބޭފުޅުން ކަމަށް އޭނާ ވިދާޅުވި އެވެ. އެހެންކަމުން، އެ އަންނަ ލީޑަރަކާއި އެކު ޕާޓީގެ އެންމެހައި ފަރާތްތައް ތިބެންޖެހޭ ކަމަށާ، އެމީހަކާއި އެކު ޕާޓީ ކުރިއަށްދާން ޖެހޭކަމަށް ވެސް ނިޔާޒު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
