ރ. މީދޫ އަދި ހއ. ހޯރަފުށީގައި ހޮސްޕިޓަލް އަޅާނެ ބަޔަކު ހޯދުމަށް އިއުލާން ކޮށްފިއެވެ.

ފިނޭންސް މިނިސްޓްރީން ކޮށްފައިވާ އިއުލާނެއްގައި ބުނީ، މި މަސައްކަތްތަކަށް ޝަރުޠުހަމަވާ ފަރާތެއް ހޯދުމުގެ ކަންތައް ކުރިޔަށް ގެންދާނީ ނެޝަނަލް ކޮންޕެތިތިވް ބިޑިންގ (އެން.ސީ.ބީ) އުސޫލުން ކަމަށެވެ. 

އަދި އެ މަސައްކަތުގެ ބީލަމުގައި ބައިވެރިވާ ފަރާތްތަކުން 500ރ ގެ ނޮން-ރިފަންޑަބަލް ރަޖިސްޓްރޭޝަން ފީއެއް ދައްކަން ޖެހޭއިރު ޕްރޮޖެކްޓުގެ ކޮންމެ ހޮސްޕިޓަލަކަށް ބިޑްސެކިއުރިޓީގެ ގޮތުުގައި 472،000ރ ދައްކަން ޖެހެއެވެ.

ފައިސާ ބަލައިގަންނާނީ 12 ޖަނަވަރީ އިން 13 ފެބްރުވަރީ 2023 އަށް، ބަންދު ނޫން ކޮންމެ ދުވަހެއްގެ 8:00 އިން 14:00 އަށް މިމިނިސްޓްރީގެ އޮންލައިން ޕޭމަންޓް ޕޯޓަލް - ބަނޑޭރި ޕޭ މެދުވެރި ކޮށް ކަމަށާވާއިރު ފައިސާ ދެއްކުމަށްފަހު، ބީލަންތަށް ރަޖިސްޓްރީވުމަށް އެދޭ ފަރާތުގެ ނަމާއި އެޑްރެސް، ގުޅޭނެ ނަންބަރާއި އީ-މެއިލް އެޑްރެސް އަދި ފައިސާ ދެއްކި ރަސީދުގެ ކޮޕީ ތިރީގައިވާ އީމެއިލް އެޑްރެހަށް ފޮނުއްވަން ބުނެފައިވެއެވެ. 

މި ދެ ރަށުގައި ހޮސްޕިޓަލެއް އެޅުމަށް ހުށަހެޅޭ ބިޑު ތައް ހުޅުވުމަށް ހަމަޖެހިފައިވަނީ 16 ފެބްރުއަރީ ވާ ބުރާސްފަތި ދުވަހު 11:00 ގައެވެ.

ދައުލަތުގެ މިއަހަރުގެ ބަޖެޓުގައި ހޯރަފުށި ހޮސްޕިޓަލް އެޅުމަށް ފަސްލައްކަ ރުފިޔާ ހިމަނާފައިވާއިރު ތުޅާދޫ ހޮސްޕިޓަލް އެޅުމަށް ހިމަނާފައިވަނީ 4.4 މިލިއަން ރުފިޔާ އެވެ. އަދި މީދޫ ހޮސްޕިޓަލް އެޅުމަށް ހަ މިލިއަން ރުފިޔާ ހިމަނާފައިވެއެވެ.