އަދާލަތު ޕާޓީގެ ސިޔާސީ ނިންމުންތައް އަބަދުވެސް ނިންމާނީ އިސްލާމް ދީނާއި ރައްޔިތުންގެ މަސްލަހަތު އެންމެ ބޮޑަށް ހާސިލް ކުރެވޭނެ ގޮތް ބަލައިގެން ކަމަށް އެޕާޓީގެ ރައީސް އަދި ހޯމް މިނިސްޓަރު ޢިމްރާން ވިދާޅުވެއްޖެއެވެ.
މިއަހަރު ބާއްވާ ރިޔާސީ އިންތިހާބަށް ސިޔާސީ އެންމެ ބޮޑު ދެ ޕާޓީ، އެންޑީޕީ އަދި ޕީޕީއެމް އިން ފޯރީގައި ތައްޔާރު ވަމުން އަންނައިރު، މި އިންތިޚާބު ގައި އަދާލަތު ޕާޓީން ވާދަ ކުރާނެކަން ނުވަތަ ނޫންކަމެއް އެ ޕާޓީން ހާމަކޮށްފައެއް ނުވެއެވެ.
އެހެން ނަމަވެސް، އެހެން ފަހަރު ތަކެކޭ އެއްފަދައިން ކޮންމެވެސް އެއް ޕާޓީއަކާއި ކޯލިޝަން ހަދާނެކަން ވަރަށް ބޮޑަށް ޔަގީންވެއެވެ.
އެގޮތުން ކުރިއަށް އޮތް ތަނުގައި ރިޔާސީ އިންތިހާބާއި ގުޅިގެން އަދާލަތު ޕާޓީން ނިންމާނެ ނިންމުމާއި ގުޅިގެން ޢިމްރާން މިއަދު ކުރެއްވި ޓްވީޓެއްގައި ވިދާޅުވީ، އެ ޕާޓީގެ ސިޔާސީ ނިންމުންތައް އަބަދުވެސް ނިންމާނީ އިސްލާމް ދީނާއި ، ގައުމާއި، ރައްޔިތުންގެ މަސްލަހަތު އެންމެ ބޮޑަށް ހާސިލް ކުރެވޭނެ ގޮތް ބަލައިގެން ކަމަށެވެ.
އަދާލަތު ޕާޓީއަކީ ދީނީ ޢިލްމުވެރިން ހިމެނިގެން އުފެދިގެން އައިސްފައިވާ ޕާޓީއަކަށް ވާއިރު، އަދުގެ ސަރުކާރުގެ ކޯލިޝަންގައި ވެސް އެ ޕާޓީ ހިމެނެއެވެ.
އަދި ދީނީ ޕާޓީއެއް ކަމަށް ދައުވާ ކުރަމުން، ސަރުކާރުގެ ކޯލިޝަންގައި ވެސް ހިމެނޭއިރު، ސަރުކާރުން ހިންގަމުންދާ ލާދީނީ ކަންކަމާއި ދެކޮޅަށް އެ ޕާޓީން "ޗުއްޕު" ވެސް ނުބުނާތީ ގިނަބަޔަކު އަންނަނީ އެ ޕާޓީއަށް ވަރަށް ބޮޑަށް ފާޑުކިޔަމުންނެވެ.
ވަކިން ޚާއްޞަކޮށް، މި ސަރުކާރު އައި ފަހުން، އެއްޖިންސުން ގުޅުން ހިންގުމުގެ މައްސަލައާއި، މަސާޖު ޕާލަރުތަކާއި، ހަށިވިއްކުން އެތައް ގުނައެއް އިތުރުވެ، ވަރަށް ފާޅުގައި ކުރަމުންދާއިރު، އެކަންކަން ހުއްޓުވުމުގެ ޒިންމާ އަދާ ކުރާ ހޯމް މިނިސްޓްރީގެ މިނިސްޓަރުގެ މަގާމް ގައި އިމްރާން ހުރެމެ، އެކަންކަން ނުހުއްޓޭތީ ދީނީ ޢިލްމުވެރިންނާއި ސިޔާސީ ފަރާތްތަކުން ވެސް އަންނަނީ ފާޑުކިޔަމުންނެވެ.
Advertisement
This content is created and paid for by advertisers and does not involve Voice Journalists
