ވ. އާރަށުގެ މުއާމަލާތާއި ގުޅިގެން ވާދަވެރި ސިޔާސީ ލީޑަރު ރައީސް ޔާމީން އަބްދުލްގައްޔޫމުގެ މައްޗަށް ކޮށްފައިވާ ހުކުން އިސްތިއުނާފުކުރުން ލަސްވާ ސަބަބާއި ގުޅިގެން ގާނޫނީ ވަކީލުން އާ ވާހަކަތަކެއް ހިއްސާ ކުރައްވައިފި އެވެ.
ރައީސް ޔާމީންގެ މައްސަލަ އިސްތިއުނާފު ކުރުން ލަސްވާ ސަބަބުތަކާއި ގުޅިގެން ނޫސްވެރިންގެ ގިނަ ސުވާލުތަކެއް އެމަނިކުފާނުގެ ގާނޫނީ ވަކީލުންގެ ޓީމަށް އަމާޒުވަމުން ދިއުމާއި ގުޅިގެން، ރައީސް ޔާމީންގެ ގާނޫނީ ވަކީލުންގެ ޓީމުގައި ހިމެނިވަޑައިގަންނަވާ އާދަމް ޝަމީމު ކުރެއްވި ޓްވީޓެއްގައި ވިދާޅުވީ، މައްސަލަ އިސްތިއުނާފުކުރަން ބޭނުންވާ ބައެއް ރިޕޯޓުތައް އަދިވެސް ގާނޫނީ ޓީމަށް ފޯރުކޮށްދީފައި ނުވާކަމަށެވެ.
އެގޮތުން ރައީސް ޔާމީންގެ ގެ މައްސަލައިގެ ޝަރީޢަތް ނިމުނު ގޮތުގެ ރިޕޯޓު އަދިވެސް ނުލިބޭ ކަމަށާއި، އިއްޔެ ކްރިމިނަލް ކޯޓުން ގުޅައި ރައީސް ޔާމީންގެ ފަރާތްޕުޅުން އެދިފައިވާ އެދިފައިވާ ލިޔުންތަކަށް އެކު ޖުމްލަ 8196 ރުފިޔާ އަރާކަމަށް ބުނި ކަމަށާއި އެ ފައިސާ ދެއްކުމަށް އަންގާފައިވާކަމަށް ޝަމީމު ވިދާޅުވިއެވެ.
އެހެން ނަމަވެސް ކްރިމިނަލް ކޯޓަށް ފައިސާ ދައްކަން ޖެހެނީ ބަންޑާރަ ޕޯޓަލް މެދުވެރިކޮށް ކަމަށްވާއިރު، މިހާތަނަށްވެސް ފައިސާ ދެއްކުމަށް ބަންޑާރަ ޕޯޓަލްގެ ލިންކު އަދިވެސް ކްރިމިނަލް ކޯޓުން ހިއްސާކޮށްފައި ނުވާކަމަށް ޝަމީމު ވިދާޅުވި އެވެ.
އަދި އެކަމުގެ ސަބަބުން މިހާތަނަށްވެސް އެދިފައިވާ ލިޔުންތައް ނުލިބޭކަމަށް އޭނާ ވިދާޅުވިއެވެ.
ވ. އާރަށުގެ މުއާމަލާތާއި ގުޅުވާ ރައީސް ޔާމީންގެ މައްޗަށް އުފުލާފައިވާ ދެ ދައުވާ އެމަނިކުފާނުގެ މައްޗަށް ސާބިތުވާކަމަށް ކަނޑައަޅާ 11 އަހަރުގެ ޖަލުހުކުމެއް ކްރިމިނަލް ކޯޓުން އިއްވާފައިވަނީ ނިމިދިޔަ ޑިސެމްބަރުމަހެ 25 ގައެވެ.
އެހެން ނަމަވެސް އެ ހުކުން ގަބޫލު ނުކުރާކަމަށާއި، އެ ހުކުމް އެމަނިކުފާނުގެ ފަރާތްޕުޅުން އިސްތިއުނާފު ކުރައްވާނެކަމަށް ރައީސް ޔާމީންގެ ގާނޫނީ ވަކީލުން ވަނީ ހަމަ އެދުވަހު ވިދާޅުވެފައެވެ.
ދަށު ކޯޓުން އިއްވާ ހުކުމް 60 ދުވަހުގެ ތެރޭގައި ހައި ކޯޓުގައި އިސްތިއުނާފުކުރަން ޖެހޭނެއެވެ. ރައީސް ޔާމީންގެ މައްސަލަ ވީ އެންމެ އަވަހަކާ އިސްތިއުނާފުކުރަން ބޭނުންވާކަމަށް ގާނޫނީ ޓީމުން ވިދާޅުވި ނަމަވެސް، މައްސަލަ އިސްތިއުނާފުކުރަން ބޭނުންވާ މުހިންމު ލިޔުންތައް ނުލިބޭތީ، އެ މައްސަލައިގެ އިސްތިއުނާފަށް ވަނީ ހުރަސްއެޅިފަ އެވެ.
އެގޮތުން މައްސަލަ ނިންމި ގޮތުގެ ޚުލާސާ ރިޕޯޓަކީ މައްސަލަ ނިންމާ ދުވަހު އެ މައްސަލައިގައި ހިމެނޭ ދެ ފަރާތަށް ފޯރުކޮށްދޭން ޖެހޭނެ ލިޔެކިޔުމެއްކަމަށް ރާއްޖޭގެ ސުޕްރިމް ކޯޓުން ކަނޑައަޅާފައި ވީ ނަމަވެސް، އެ ލިޔުންވެސް ލިބުނީ ވަކީލުން ކްރިމިނަލް ކޯޓަށް ވަޑައިގެން ވަރަށް ގިނަ މަސައްކަތްތަކެއް ކުރެއްވުމަށްފަހުގަ އެވެ.
Advertisement
This content is created and paid for by advertisers and does not involve Voice Journalists
