ދިވެހިރާއްޖެއަކީ އިންޑިއާގެ ބައެއް ކަމަށް ޓްރާންސްޕޯޓު މިނިސްޓްރީގެ ޑެޕިއުޓީ މިނިސްޓަރު ސައުދުﷲ އަހުމަދު ވިދާޅުވި ވިދާޅުވުން، ރަސްމީކޮށް އިސްލާހު ކުރަންޖެހޭ ކަމަށް ކުރީގެ ކެޕްޓަން އަލީ އިހްސާން ވިދާޅުވެއްޖެއެވެ.

އިންޑިއާގެ ކުރިއަށްދިޔަ ކޮންފަރެންސްގައި އެގައުމަށް ކުރި ދަތުރުގައި 'ދަ ނިއު އިންޑިއަން' ނޫހަށް އިނގިރޭސިބަހުން ދެއްވި ބަސްދީގަތުމެއްގައި ސައުދުالله ވަނީ، ދިވެހިރާއްޖެއަކީ މިނިވަން ގައުމެއްގެ ގޮތުގައި ކަނޑައެޅުނު ދުވަހުން ފެށިގެންވެސް އިންޑިޔާ އާއި ރާއްޖެ އަކީ އެއް އާއިލާއެއްގެ "މަންމަ އާއި ބައްޕަ" ފަދަ ދެ ގައުމު ކަމަށެވެ. އަދި ދެގައުމު ދެމެދުގައި އޮތް ގުޅުމާއި މެދު ވަރަށް ބޮޑަށް ފަޚްރުވެރިވެވަޑައިގަންނަވާކަމަަށް އޭނާ ވިދާޅުވި އެވެ. 

މިއާއެކު ސައުދުالله ވަނީ، ތައުލީމީ ދާއިރާއާއި، ސިއްހީ ދާއިރާއާއި، އަދި އެނޫންވެސް ދާއިރާ ތަކުން އިންޑިޔާ އިން، ރާއްޖެއަށް ވެދެމުންދާ ތައް އެހީތައް ފާހަގަކުރައްވައި، އިންޑިޔާގެ ބައެއްގެ ގޮތުގައި ރާއްޖެ އޮތް ކަމީ ވަރަށް ބޮޑު އުފަލެއް ކަމުގައި ވިދާޅުވެފައެވެ. 

"ވީ އާ ގްލޭޑް ޓު ބީ އަ ޕާޓް އޮފް އިންޑިއާ" ސައުދުالله އަހުމަދު ވިދާޅުވި އެވެ. 

މިކަމާއި ގުޅިގެން ކަންބޮޑުވުންފާޅުކުރައްވާ ކެޕްޓަން އިހްސާން ކުރެއްވި ޓްވީޓެއްގައި ވިދާޅުވީ ދިވެހިރާއްޖޭއަކީ އިންޑިޔާގެ ބައެއް ނޫންކަމަށާއި އަދި ދުވަހަކުވެސް އިންޑިއާގެ ބައެއްކަމަކަށް ނުވާނެކަމަށެވެ.

"ދިވެހިރާއްޖެއަކީ އިންޑިއާގެ އަވަށްޓެރި ގައުމެއް. އަދި އަބަދުވެސް އަވައްޓެރިއެއްގެ ގޮތުގައި އޮންނާނެ. ރާއްޖެއިން އަބަދުވެސް ދެގައުމުގެ ޒަމާންވީ ގުޅުމުގެ އަގު ވަޒަންކޮށް އިހުތިރާމް ކުރޭ. އަދި އެ ގުޅުން އެގޮތަށް ދެމިއޮންނަންވާނެ." އިހްސާން ވިދާޅުވި އެވެ. 

އެހެން ނަމަވެސް އެއަށްވުރެ އެ ގުޅުން ބޮޑުކޮށް، ރާއްޖެ އަކީ އިންޑިޔާގެ ބައެއް ކަމުގައި ދެކިގެން ނުވާނެކަން ފާހަގަކުރައްވައި އިހްސާން ވަނީ ސަރުކާރުގެ އޮފިޝަލުންގެ މިފަދަ ވާހަކަތަކަށް ސަރުކާރުން ޖާގަ ދީގެން ނުވާނެ ކަމަށާއި މިފަދަކަންކަން ރަސްމީކޮށް އިސްލާހު ކުރަން ޖެހޭ ކަމަށް ވިދާޅުވެފައެވެ.

ރާއްޖެ އަކީ އިންޑިޔާގެ ބައެއްގެ ގޮތުގައި ސިފަކުރައްވައި ސައުދުﷲ ވާހަކަދެއްކެވުމާއި ގުޅިގެން ގިނަ ބައެއްގެ ފާޑުކިޔުންތައް ވަނީ އޭނާއަށް އަމާޒުވެފައެވެ.