މިހާރު ދިވެހިންނަށް ވިސާއާ ނުލާ ކެމްބޯޑިޔާއަށް ދަތުރު ކުރެވޭނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.

ރައީސް މިހެން ވިދާޅުވީ، ރަސްމީ ދަތުރުފުޅެއްގައި މިހާރު ދިވެހިރާއްޖެއަށް ވަޑައިގެން އުޅުއްވާ ކެމްބޯޑިއާގެ ބޮޑުވަޒީރު ސަމްދެކް އައްކާ މޮހަ ސެނާ ޕަޑައި ޓެކޯ ހުން ސެންއަށް އާއެކު ރައީށް އޮފީހުގައި ވާހަކަފުޅު ދައްކަވަމުންނެވެ.

ރައީސް ވިދާޅުވީ، ދެ ގައުމުގެ ދެމެދުގައި ގުޅުން ބަދަހި ވުމުގެ ފައިދާ ދެ ގައުމަށްވެސް ކުރާނެ ކަމަށެވެ. އަދި އެއްގައުމުން އަނެއް ގައުމަށް، ވިސާއާނުލާ، 30 ދުވަހުގެ މުއްދަތަށް ދަތުރު ކުރެވޭނެ ކަމަށެވެ.

Advertisement

ދެ ގައުމެއްގެ ދެމެދުގައި އޮންނަ ގުޅުމެއްގެ އެންމެ މުހިންމު ބަޔަކީ އެ ދެގައުމެއްގެ ރައްޔިތުންގެ މެދުގައި ގާއިމު ވެފައި އޮންނަ ބަދަހި  ގުުޅުން ކަމަށް ރައީސް ފާހަގަ ކުރެއްވިއެވެ.

"އެހެން ކަމުން އަޅުގަނޑުމެން ދެ ގައުމުގެ މެދުގަ ވިސާ ނެގުމަކާ ނުލާ އެއް ގައުމުން އަނެއް ގައުމަށް ދަތުރު ކުރުމުގެ އެއްބަސްވުމެއްގަ ސޮއި ކުރެވުނުކަމީ އަޅުގަނޑު އެކަމާ މެދު ނުހަނު އުފާކުރާ ކަމެއް. މިހާރު ދިވެހިންނާ ކެމްބޯޑިޔާގެ ރައްޔިތުންނަށްވެސް ވިސާ ނެގުމަކާ ނުލާ، 30 ދުވަހުގެ މުއްދަތަށް ދެ ގައުމުގެ ދެމެދުގާ ދަތުރު ކުރެވޭނެ" ރައީސް ވިދާޅުވިއެވެ.

ރައީސުލްޖުމްހޫރިއްޔާގެ ދަޢުވަތަކަށް ކެމްބޯޑިއާގެ ބޮޑުވަޒީރު ރާއްޖެއަށް ކުރައްވާ ދެދުވަހުގެ މި ދަތުރުފުޅުގައި ރާއްޖެއާއި ކެމްބޯޑިއާ އާ ދެމެދުގައި ގުޅުން ބަދަހިކުރުމަށް ރަސްމީވާހަކަފުޅުތައް ބާއްވަވާނެއެވެ. މީގެއިތުރުން ދެޤައުމުގެ ދެމެދުގައި ގުޅުން ބަދަހިކުރުމުގެ ބައެއް އެއްބަސްވުންތަކުގައި ވެސް ސޮއިކުރައްވައި، މި ދަތުރުފުޅާއި ބެހޭގޮތުން ދެ ޤައުމުގެ އިސްވެރިން ގުޅިފައިވާ ބަޔާނެއް ދެއްވުމަށްވެސް ވަނީ ހަމަޖެހިފައެވެ.

މި ދަތުރުފުޅަކީ، ކެމްބޯޑިއާ ސަރުކާރުގެ އިސްވެރިޔާ، ބޮޑުވަޒީރު ސަމްދެކް އައްކާ މޮހަ ސެނާ ޕަޑައި ޓެކޯ ހުން ސެން ރާއްޖެއަށް ކުރައްވާ މިފަދަ ފުރަތަމަ ރަސްމީ ދަތުރުފުޅެވެ. ރާއްޖެއާއި ކެމްބޯޑިއާއާ ދެމެދު ސިޔާސީ ގުޅުން ޤާއިމްކޮށްފައިވަނީ 1995 ވަނަ އަހަރުގެ ސެޕްޓެމްބަރު މަހުގެ 21 ވަނަ ދުވަހުއެވެ.