އެމްޑީޕީގެ ރިޔާސީ ޕްރައިމަރީގެ ކެމްޕެއިންއަށް ރައީސުލްޖުމްހުރިއްޔާ އިބްރާހީމް މުހައްމަދު ޞާލިހު ހއ. އަތޮޅަށް ވަޑައިގެންފިއެވެ.

ރައީސް ސާލިހު މި ދަތުރުފުޅު ހޯރަފުށި، ކެލާ، އިހަވަންދޫ އަދި ދިއްދޫއަށް ވަޑައިގަތުމަށް ވަނީ ހަމަޖެހިފައެވެ.

އެގޮތުން އެންމެ ފުރަތަަމަ އެމަނިކުފާނު ވަޑައިގެންނެވީ ހއ.ހޯރަފުއްޓަށެވެ. އެރަށުގައި އެމަނިކުފާނުގެ އިސްތިގުބާލުގައި، އެމްޑީޕީގެ އެމަނިކުފާނަށް ތާއީދު ކުރާ ގިނަ ބަޔަކު ވަނީ ލަފާ ސަރަހައްދަށް އެއްވެފައެވެ. 

ރައީސް ޞާލިހުގެ ހޯރަފުށީގެ މިދަތުރުފުޅުގައި އެމަނިކުފާނު ވަނީ އެރަށުގެ އެމްޑީޕީ މެންބަރުންނާއި ބައްދަލު ކުރައްވާފައެވެ. 

ހޯރަފުށްޓަށްފަހު އިހަވަންދޫ އަށް އެމަނިކުފާނު ވަޑައިގެންފައިވާއިރު އެރަށުންވެސް އެމަނިކުފާނަށް ތާއިދުކުރާ ގިނަ މެންބަރުން ވަނީ މަރުހަބާ ކިޔަން ބަންދަރު ސަރަހައްދަށް އެއްވެފައެވެ. އިހަވަންދޫގެވެސް އެމްޑީޕީ މެމްބަރުންނާއި ރައީސް ޞާލިހު ބައްދަލު ކުރައްވަން ހަމަޖެހިފައިވާއިރު، އެރަށަށްފަހު ކެލާއަށް ވަޑައިގެން އެރަށުގެ އެމްޑީޕީ މެންބަރުންނާއި ވެސް ބައްދަލު ކުރައްވާނެއެވެ. 

ރައީސް ޞާލިހު ގެ ހއ ގެ މި ދަތުރުފުޅު ނިންމަވާލައްވާނީ އެ އަތޮޅު ދިއްދޫ އިންނެވެ. އެރަށުގައި އެމަނިކުފާނު ވަޑައިގަންނަވާ ޖަލްސާ އެއް މިއަދު ބޭއްވުމަށް ވަނީ ހަމަޖެހިފައެވެ.