ހއ. ހޯރަފުށީގައި ހޮސްޕިޓަލެއް ތަރައްޤީ ކުރުމަށް ވެވަޑައިގެންނެވި ވައުދު މަތިން ހަނދުމަފުޅު ނުނެތޭ ކަމަށާ، ދެން ހޯރަފުށީގެ ރައްޔިތުންނާއި ބައްދަލު ކުރާނީ ހޮސްޕިޓަލުގެ މަސައްކަތް ނިންމާފައި ކަމަށް ރައީސުލްމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.

އެމްޑީޕީގެ ރިޔާސީ ޕްރައިމަރީގެ ކެމްޕެއިނަށް ރައީސް ޞާލިހު ހއ އަށް ކުރައްވަމުންދާ ދަތުރުފުޅުގައި ހޯރަފުށްޓަށް ވަޑައިގެން އެ ރައްޔިތުންނާއި ބައްދަލު ކުރައްވައި ވިދާޅުވީ، އެމަނިކުފާނު ވެފައިވާ އެއްވެސް ވައުދަކީ ދޫކޮށްލާނެ ވައުދެއް ނޫންކަމަށެވެ.

އަދި ހޯރަފުށީގައި ހޮސްޕިޓަލެއް އެޅުމުގެ ވައުދަކީ ހަނދާން ނެތިފައިވާ ވައުދެއް ނޫންކަން ފާހަގަކުރައްވައި ރައީސް ވިދާޅުވީ އެ ހޮސްޕިޓަލުގެ މަސައްކަތް މިހާރު އޮތީ ޓެންޑަރިންގެ މަރުހަލާގައިކަމަށެވެ. 

"ޔަގީން ކުރައްވައްޗޭ. ޔަގީން ކުރައްވައްޗޭ. އަޅުގަނޑުމެންނަކީ ވައުދެއްވަފަ އެކަން ދޫކޮށްލާނެ ބައެއްނޫން. މިއަދު އެވަނީ ހޮސްޕިޓަލް ޓެންޑާކޮށް ފައިނަލް މަރުހަލާގަ. އިރާދަކުރެއްވިއްޔާ ލަސްތަކެއްނުވެ އެމަސައްކަތް ކުރާނެ ރަނގަޅު ބަޔަކާއި، ފަށާގޮތަށްގޮސް ނިންމާނެ ބަޔަކާއި އަޅުގަނޑުމެން ހަވާލުކުރާނަން. އިރާދަކުރެއްވިއްޔާ ދެން އަޅުގަނޑު މިރަށަށް އައިސް ތިޔަބޭފުޅުންނާއި ބައްދަލު ކުރާނީ މިހޮސްޕިޓަލުގެ މަސައްކަތްވެސް ނިންމާފަ." ރައީސް ޞާލިހު ވިދާޅުވިއެވެ.

މީގެ އިތުރުން ވެސް ރައީސް ޞާލިހް ވަނީ، އެމަނިކުފާނުގެ ދައުރުގައި ހޯރަފުށީގެ ތަރައްޤީ އަށް ގިނަ މަސައްކަތްތަކެއް މިހާރުވެސް ކޮށްދެވިފައިވާ ކަމަށް ވިދާޅުވެ، އެކަންކަމަށް އަލިއަޅުވާލައްވާފައެވެ. 

ރައީސް ޞާލިހުގެ ކެންޕެއިނަށް ހއ އަށް ކުރައްވަމުންދާ މި ދަތުރުފުޅުގައި ހޯރަފުށީގެ އިތުރުން އެ އަތޮޅުގެ އިހަވަންދޫ އާއި، ކެލާ އަދި ދިއްދޫ އަށް ވަޑައިގެން އެ ރަށު އެމްޑީޕީ މެންބަރުންނާއި ބައްދަލު ކުރެއްވުމަށް ހަމަޖެހިފައިވާއިރު، ދިއްދޫގައި ބޮޑު ޖަލްސާ ބޭއްވުމަށް ވެސް ވަނީ ހަމަޖެހިފަ އެވެ.