ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ހއ އިހަވަންދޫއަށް ކުރައްވާ ދަތުރުފުޅުގައި އެމަނިކުފާނަށް މަރުހަބާ ދެންނެވުމަށް އިހަވަންދޫ ސުކޫލުގެ ދަރުވަރުން ނެރުނީ އެޑިއުކޭޝަން މިނިސްޓްރީއިން ހުއްދަ ހޯދައިގެން ނޫންކަން އެ މިނިސްޓްރީއިން ހާމަކޮށްފިއެވެ.
ރައީސް އިބްރާހިމް މުހައްމަދު ސޯލިހު މިއަދު އިހަވަންދޫއަށް ވަޑައިގެންފައިވާއިރު، އެމަނިކުފާނަށް މަރުހަބާ ދެންނެވުމަށް އިހަވަންދޫ ސުކޫލުގެ ގްރޭޑް 1-5 ގެ ދަރިވަރުންނާއި ބެލެނިވެރިން އެ ރަށު ބަނދަރު ސަރަހަށްދަށް ނިކުތުމަށް އިހަވަންދޫ ސުކޫލުން ވަނީ އަންގާފަ އެވެ.
ރައީސް ސޯލިހުގެ އިސްތިގުބާލަށް ނިކުތުމަށް އަންގާ އިހަވަންދޫ ސުކޫލުން ނެރުނު އިއުލާނު
އެކަމާ ގުޅޭގޮތުން އެޑިއުކޭޝަން މިނިސްޓްރީއިން ބުނީ އިހަވަންދޫ ސުކޫލުގެ ދަރިވަރުން ރައީސް ސޯލިހަށް މަރުހަބާ ދަންނަވަން ނެރޭކަން މިނިސްޓްރީއަށް އަންގާފައި ނުވާކަމަށެވެ.
އެފަދައިން އިހަވަންދޫ ސުކޫލުން އަމަލުކުރީ މިނިސްޓްރީއަށް އެނގިގެން ނޫން ކަމަށާއި، މަރުހަބާ ދެންނެވުމަށް ދަރިވަރުން ނެރުމާއި ގުޅޭގޮތުން އަމަލުކުރަންވީ ގޮތް އެޑިއުކޭޝަން މިނިސްޓްރީއިން ސުކޫލުތަކަށް އަންގާފައިވާނެ ކަމަށާއި، މިނިސްޓްރީއިން އަމަލު ކުރަމުންދާނީ އެ އުސޫލުގެ މަތިންކަމަށް އެޑިއުކޭޝަން މިނިސްޓްރީއިން ވަނީ ބުނެފައެވެ.
މަރުހަބާ ކިޔުމަށް ސުކޫލު ދަރިވަރުން ބައިވެރި ކުރުމުގައި އަމަލުކުރަންވީގޮތް ބަޔާންކޮށް އެޑިއުކޭޝަނުން ނެރެފައިވާ ސާކިއުލާ
އެޑިއުކޭޝަން މިނިސްޓަރު ޑރ އާއިޝަތު އަލީ ސޮއިކުރައްވާ ސުކޫލުތައް އަންގާފައިވާ ސާކިއުލާގައި ބުނެފައިވަނީ ސަރުކާރުގެ އިސްވެރިންނާއި އިއްޒަތްތެރިން ރަށްރަށަށް ކުރައްވާ ދަތުރުފުޅުތަކުގައި އެ ފަރާތްތަކަށް މަރުހަބާ ދެންނެވުމަށް ދަރިވަރުން އަވީގައި ގިނަ ވަގުތު ބޭތިއްބުމަކީ އެކުދިންގެ ސިއްހަތަށް ނޭދެވޭ އަސަރު ކުރާނެ ކަމެއްކަމަށް ވާނެތީއާއި، އެކަމުގެ ސަބަބުން ދަރިވަރުންނާއި ބެލެނިވެރިންގެ ވަގުތުތައް ގެއްލިގެން ދާނެތީ، މަރުހަބާ ދެންނެވުމަށް ދަރިވަރުން ނުނެރުމަށް އަންގާކަމަށެވެ.
އެހެންކަމުން މިއަދު އިހަވަންދޫ ސުކޫލުގެ ދަރިވަރުންތަކެއް ރައީސް ސޯލިހަށް މަރުހަބާ ދެންނެވުމަށް ނެރެފައިވައިވާނީ މިނިސްޓްރީގެ އުސޫލާއި ޚިލާފަށެވެ.
އެހެން ނަމަވެސް އެކަމާއި ގުޅޭގޮތުން އަޅާނެ އެއްވެސް ފިޔަވަޅެއް އެޑިއެކޭޝަނުން އަދި ހާމަކޮށްފައެއް ނުވެއެވެ.
Advertisement
This content is created and paid for by advertisers and does not involve Voice Journalists
