ބިން ހިއްކުމަށް ވަޢުދުވެވަޑައިގެންނެވި ހުރިހާ ރަށެއްގައި މި ދައުރު ނިމުމުގެ ކުރިން ބިން ހިއްކާ ނިންމަވާނެ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.

އެމްޑީޕީ ޕްރައިމެރީ ކެމްޕޭންގެ ތެރެެއިން ރޭ ދިއްދޫގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޞާލިޙު ވިދާޅުވީ، ބިމުގެ ދަތިކަން ކުރިމަތިވެފައި ހުރި ރަށްތަކުގެ ތެރެއިން ބިން ހިއްކަވާނެ ކަމަށް އެމަނިކުފާނު ވަޢުދުވެވަޑައިގެންނެވި ރަށްރަށުގެ ތެރެއިން އެ މަސައްކަތް ނުފެށި ހުރި ރަށްތަކުގެ ބިން ހިއްކުމަށް ބޭރުގެ ކުންފުންޏަކާއި ހަވާލުކުރަން މަޝްވަރާކުރަމުންދާކަމަށެވެ.

"ބިން ހިއްކުމަށް އަޅުގަނޑުމެން ވީ ވަޢުދުތަކުގެ ތެރެއިން ނުނިމިހުރި ރަށްތައް އެއްކޮށް ހިއްކުމަށްޓަކައި ބޭރުގެ ކުންފުންޏަކާއެކީގަ މިދަނީ މަޝްވަރާކުރަމުން. އަޅުގަނޑުގެ ވިސްނުމަކީ މިހުރިހާ ރަށެއްގެ ބިން ހިއްކުން، ބިން ބޮޑުކުރުން ވަކި ބަޔަކާއި ޙަވާލުކޮށް، އެގްރިމަންޓްގައި ސޮއިކޮށް އެ މަސައްކަތް މިދައުރުގެ ތެރޭގައި ނިންމާލުން. މިގޮތުން ދިއްދޫވެސް އޭގެ ތެރޭގައި އަޅުގަނޑުމެން ހިމަނާން" ރައީސް ވިދާޅުވިއެވެ.

Advertisement

މީގެ އިތުރުން ރައީސް ޞާލިހް ވަނީ، ދިއްދޫގައި ބިން ބޮޑު ކުރުމުގެ ތެރެއިން، އެ ރަށުގައި އެއާޕޯޓެއް ތަރައްގީ ކުރުމުގެ މަސައްކަތް މަޝްވަރާއާއެކު ކުރިއަށްގެންދަވާނެ ކަމަށް ވިދާޅުވެ ދިއްދޫގެ ރައްޔިތުންނަށް އެއާޕޯޓް ގެ ހުވަފެން ދައްކަވާފައެވެ. 

"އެއާޕޯޓެއްގެ ވާހަކައަކީ އަޅުގަނޑުމެންނަށް ނުދެއްކޭނެ ވާހަކައެއް ނޫން، އަޅުގަނޑުމެން އިރާދަކުރެއްވިއްޔާ އަންނާނަން، މި ޕްރައިމަރީއަށް ފަހުގައި، ރިޔާސީ އިންތިހާބުގެ ކެމްޕޭން ތެރޭގައި މެނިފެސްޓޯއެއް އެކުލަވާލާނަން، ތިޔަ ބޭފުޅުންނާއި މަޝްވަރާ ކުރާނަން، އޭގައި މިރަށުގެ އެއާޕޯޓެއް ނުހިމަނަންވީ ސަބަބެއް އަޅުގަނޑަކަށް ނުފެނޭ". ރައީސް ވިދާޅުވިއެވެ.