ރައީސް ޔާމީން އަބްދުލްގައްޔޫމުގެ ވ އާރަށު މައްސަލައިގައި ދައުލަތުގެ ފަރާތުން ހުށައެޅި އެމްއެމްޕީއާރުސީގެ ކުރީގެ މެނޭޖިން ޑިރެކްޓާ ޒިޔަތާއި، ކުރީގެ ނައިބުރައީސް އަހުމަދު އަދީބު ކޯޓަށް ދިން ހެކިބަހުގެ އިތުރުން ގިނަ ވާހަކަތަކެއް މައްސަލަ ނިންމިގޮތުގެ ރިޕޯޓުގައި ހިމަނާފައިވާކަން ހާމަވެއްޖެ އެވެ. 

ރައީސް ޔާމީންގެ މައްޗަށް ހުކުން ކުރިތާ 22 ދުވަސް ފަހުން އެ މައްސަލަ ނިންމިގޮތުގެ ރިޕޯޓު ގާނޫނީ ވަކީލުންނާއި ހަވާލުކޮށްފައިވަނީ، ރިޕޯޓު ނުދީ ލަސްކުރުމާއި ގުޅިގެން ގިނަ ފާޑުކިޔުންތަކެއް އަމާޒުވީފަހުން ނެވެ. 

އެގޮތުން މައްސަލަ ނިންމި ގޮތުގެ ރިޕޯޓަކީ ހުކުން އިއްވާއިރު ތައްޔާރުކޮށްފައި އޮންނަންޖެހޭ ރިޕޯޓެއް ކަމަށާއި، އެ ރިޕޯޓު ނުދީ ހިފަހައްޓަނީ ރިޕޯޓަށް އުނި އިތުރު ގެނައުމަށްކަމަށް އިދިކޮޅުންވެސް އޭރު ގެންދިޔައީ ބޮޑެތި ތުހުމަތުތަކެއް ކުރަމުންނެވެ. 

Advertisement

އެއާއެކު މައްސަލަ ނިންމި ގޮތުގެ ރިޕޯޓުގައި އެފަދަ އުނިއިތުރުތައް ހުރިކަން ރައީސް ޔާމީންގެ ގާނޫނީ ވަކީލުންގެ ޓީމުގެ ހިމެނިވަޑައިގަންނަވާ ޝިޔާޒު ވަނީ ހާމަކުރައްވާފައެވެ. 

އެކަން ހާމަކުރައްވާ ޝިޔާޒު ކުރެއްވި ޓްވީޓުގައި ވިދާޅުވީ ރައީސް ޔާމީންގެ ޝަރީއަތަކީ ލައިވްކޮށް ކުރިއަށް ގެންދިޔަ ޝަރީއަތަކަށް ވާއިރު، އަދީބާއި ޒިޔަތުގެ ހެކިބަސް މިހާރުވެސް ބަލާލެވޭނެކަމަށެވެ. އަދި އަދީބާއި ޒިޔަތުގެ ހެކިބަހުގައި ނެތް ކަންކަން ރިޕޯޓުގައި އެމީހުން ބުނިކަމަށް ލިޔެފައިވާކަމަށް ޝިޔާޒު ވިދާޅުވިއެވެ. 

މައްސަލަ ނިންމި ގޮތުގެ ރިޕޯޓުގައި ލިޔެފައިވަނީ މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަނާއި ހަވާލުކުރި ހަވާލާދެވުނު 1354016 ނަންބަރު ޗެކު އެސްއޯއެފް ނަމަކަށް ކިޔާ ކުންފުންޏެއްގެ ނަމުގައި ބޭންކްއޮފް މޯލްޑިވްސްގައި ހުޅުވާފައިވާ ނަންބަރު 7701701832002 އެކައުންޓަށް ޖަމާކޮށްދިނުމަށް 2015 ސެޕްޓެމްބަރު މަހު 10 ވަނަ ދުވަހު ބޭންކް އޮފް މޯލްޑިވްސްއަށް ހުށައެޅުމުން އެ ފައިސާ ޖަމާކޮށްފައި ވަނީ އެސްއޯއެފްގެ ހަވާލާދެވުނު އެކައުންޓަށްކަން ފާހަގަކުރެވޭކަމަށެވެ.

އަދި އެކަން ހިނގައިދިޔަ ގޮތް ދައުލަތުން ހުށައެޅި ހެކިންކަމަށްވާ އަހުމަދު އަދީބު އަބްދުލްޣަފޫރާއި ޒިޔަތުގެ ޝަރީއަތުގެ މަޖިލީހުގައި ތަފްސީލުކޮށް ކިޔާދީފައިވާކަމަށް ލިޔެފައިވެއެވެ. 

ރައީސް ޔާމީންގެ ގާނޫނީ ވަކީލު ވިދާޅުވީ އެ ރިޕޯޓުގައި އެފަދައިން ލިޔެފައި އޮތަސް އެއީ އަދީބާއި ޒިޔަތު ހެކިބަސް ދެމުން ދެއްކި ވާހަކަތަކެއް ނޫންކަމަށެވެ. އަދި އެއީ އެމީހުން ބުނިކަމަށް ރިޕޯޓުގައި އތުރަށް ލިޔެފައިވާ ވާހަކަތަކެއްކަމަށް ޝިޔާޒު ވިދާޅުވިއެވެ. 

ރައީސް ޔާމީންގެ ވ އާރަށު މައްސަލަ ބައްލަވާ ހުކުން ކުރެއްވީ ކްރިމިނަލް ކޯޓުގެ އިސް ފަނޑިޔާރު އަހުމަދު ޝަކީލްއެވެ. 

އެ މައްސަލައިގައި ރައީސް ޔާމީންގެ މައްޗަށް ކޮށްފައިވާ ދެ ދައުވާ ސާބިތުވާކަމަށް ކަނޑައަޅާ ރައީސް ޔާމީންގެ މައްޗަށް 11 އަހަރުގެ ޖަލު ހުކުމެއްކޮށްފައިވަނީ ހެކިންނަށް ރިއާޔަތް ކުރުމެއް ނެތިކަމަށް ރައީސް ޔާމީންގެ ގާނޫނީ ވަކީލުންވެސް ވަނީ ފާހަގަކުރައްވާފަ އެވެ. އަދި އެ ހުކުން ބަލައި ނުގަންނަކަމަށާއި، ރައީސް ޔާމީންގެ ފަރާތްޕުޅުން މައްސަަލަ އިސްތިއުނާފު ކުރައްވާނެކަމަށް ގާނޫނީ ޓީމުން ވަނީ ވިދާޅުވެފައެވެ.