އިންޑިއާއާއެކު ދިވެހި ސަރުކާރުން އިތުރު 3 އެއްބަސްވުމެއްގައި ސޮއިކޮށްފި އެވެ. 

އިންޑިއާއާއެކު ސޮއިކޮށްފައިވަނީ އިންޑިއާގެ ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓް ސްކީމަށް 100 މިލިއަން ރުފިޔާ އިތުރުކުރުމުގެ ގޮތުން ސޮއިކުރެއްވި އެއްބަސްވުމަކާއި، ގދ.ގައްދޫގައި ސްޕޯޓްސް ކޮމްޕްލެކްސްއެއް ތަރައްގީކުރުމުގެ އެއްބަސްވުމަކާއި، ޤައުމީ ޔުނިވާރސިޓީއަށް ބޭނުންވާ ފަންނީ ތަޖްރިބާ ހޯދައިދިނުމުގެ އެއްބަސްވުމެކެވެ.

އިންޑިއާގެ ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓް ސްކީމަށް 100 މިލިއަން ރުފިޔާ އިތުރުކުރުމުގެ ގޮތުން ސޮއިކުރެއްވި އެއްބަސްވުމަކާއި، ގދ.ގައްދޫގައި ސްޕޯޓްސް ކޮމްޕްލެކްސްއެއް ތަރައްގީކުރުމުގެ އެއްބަސްވުން ރާއްޖޭގެ ފަރާތުން ބަދަލު ކުރެއްވީ ފޮރިން މިނިސްޓްރީގެ ސްޓޭޓް މިނިސްޓަރ އަޙްމަދު ޚަލީލްއެވެ. އިންޑިއާއިން މިއެއްބަސްވުންތައް ބަދަލުކުރެއްވީ އެޤައުމުން ރާއްޖެއަށް ކަނޑަޅާފައި ހުންނަވާ ހައިކޮމިޝަނަރ މުނޫ މަހާވަރުއެވެ.

ޤައުމީ ޔުނިވަރސިޓީއަށް ބޭނުންވާ ފަންނީ ތަޖްރިބާ ހޯދައިދިނުމުގެ އެއްބަސްވުން ބަދަލުކުރެއްވީ ޤައުމީ ޔުނިވަރސިޓީގެ ވައިސް ޗާންސެލަރ މުޙައްމަދު ޝަރީފްއެވެ. ކޮޗިން ނެޝަލަން ޔުނިވަރސިޓީ އޮފް ސައިންސް އެންޑް ޓެކްނޮލޮޖީގެ ފަރާތުން އެއްބަސްވުން ބަދަލުކުރެއްވީ ވައިސް ޗާންސެލަރ ޕްރޮފެސަރ ޑރ.ކޭ.އެން މަދަސޫދަނަންއެވެ.

މިއެއްބަސްވުމުގެ ދަށުން އެމްއެންޔޫއަށް ބޭނުންވާ ފަންނީ ތަޖްރިބާ ހޯދުމުގެ އިތުރުން ތަމްރީނު ޕްރޮގްރާމްތައް ހިންގުމުގެ ފުރުސަތުވެސް ފަހިވެގެންދާނެއެވެ.

އިންޑިޔާއާއި ރާއްޖެއާ ދެމެދު ސޮއިކުރި މިއެއްބަސްވުންތައް ބަދަލުކޮށްފައިވަނީ އިންޑިއާގެ މިނިސްޓަރ އޮފް އެކްސްޓަރނަލް އެފެއާޒް ޑރ. ޖައިޝަންކަރު މިހާރު ރާއްޖެއަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ނ.މަނަދޫގައި ބޭއްވި ރަސްމިއްޔާތެއްގައެވެ.

އިންޑިއާގެ އެހީގައި ރާޢްޖޭގައި ކުރިއަށްގެންދާ ތަރައްޤީގެ މަޝްރޫޢުތަކަށް ޚަރަދުކުރުމަށްޓަކައި އިންޑިއާގެ ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްސްޓް ސްކީމަށްވަނީ 100 މިލިއަން ރުފިޔާ އިތުރުކޮށްދީފައެވެ.

އިންޑިއާއާއެކު އިތުރު އެއްބަސްވުންތަކެއް ސޮއިކޮށްފައިވާއިރު، އިންޑިއާއިން ދަނީ ސިވެހި ސަރުކާރުން އެދުނު ކޮންމެ ވަގުތެއްގައި ބޮޑެތި އަދަދުތަކުން ލޯނުތައް ދޫކުރަމުންނެވެ. ރާއްޖޭގައި ހިންގާ އިންޑިއާގެ މަޝްރޫއުތަކަށްވެސް އިންޑިއާއާއި ރާއްޖެއާއި ދެމެދު ހެދިފައިވާ ލައިން އޮފް ކްރެޑިޓް ފެސެލިޓީގެ ދަށުން ފައިސާ ދޫކުރަމުންދާކަން ފާހަގަކޮށްލެވެއެވެ.