ދިވެހިރާއްޖެ ތަރައްގީ ކުރުމުގައި އެންމެ އިސް ރޯލެއް އަދާކުރަނީ އަވައްޓެރި އިންޑިއާކަމަށް ފޮރިން މިނިސްޓަރު ޝާހިދު ވިދާޅުވެއްޖެ އެވެ. 

ހަނިމާދޫ އިންޓަރނޭޝަނަލް އެއަރޕޯޓު ޒަމާނީ ފެންވަރަށް ތަރައްގީކުރުމުގެ މަޝްރޫއު އިފްތިތާހުކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ފޮރިން މިނިސްޓަރު ޝާހިދު ވިދާޅުވީ އިންޑިއާއަކީ އަބަދުވެސް ރާއްޖޭގެ ތަރައްގީއަށް މުހިއްމު ގައުމެއްކަމަށެވެ.

މިގޮތުން ރާއްޖޭގައި ކުރިއަށްދާ އުމްރާނީ ތަރައްގީގެ އެތައް މަޝްރޫއެއްގައި އިންޑިއާގެ ހިއްސާއެއް އޮތުމަކީ ރާއްޖޭގެ ތަރައްގީއަށް އެގައުމުން އިސްކަންދޭކަމުގެ އަލިގަދަ ހެއްކެއްކަމަށް ޝާހިދު ވިދާޅުވެއެވެ. 

ހަނިމާދޫ އެއަރޕޯޓަކީ އެ ސަރަހައްދުގެ ތަރައްގީއަށް ހުޅުވިގެންދާނެ ދޮރެއްގެ ގޮތުގައި ސިފަކުރައްވަމުން ޝާހިދު ވިދާޅުވީ އެ މަޝްރޫއަށް އެކަނި ބަލާލި ނަމަވެސް އިންޑިއާއިން ރާއްޖޭގެ ތަރައްގީއަށް އަހަންމިއްޔަތުކަން ދޭ މިންވަރު ހާމަވެގެންދާކަމަށެވެ. އަދި އިންޑިއާއަކީ އަބަދުވެސް ދިވެހިރާއްޖެއާއި ރާއްޖޭގެ ރައްޔިތުންނަށް ހެޔޮއެދޭ ގައުމެއްކަމަށް ޝާހިދު ވިދާޅުވި އެވެ. 

ޝާހިދު ވިދާޅުވީ އިންޑިއާއިން މިހާތަނަށް ދިވެހިރާއްޖެއަށް 2.7 ބިލިއަން ޑޮލަރުގެ އެހީތެރިކަން ފޯރުކޮށްދީފައިވާކަމަށެވެ. އަދި އޭގެ ތެރެއިން 173.4 މިލިއަން ޑޮލަރަކީ ހިލޭ އެހީކަން ޝާހިދު ފާހަގަކުރެއްވި އެވެ.

އެއާއެކު އޭނާ ވިދާޅުވީ މިހާރު ރާއްޖޭގައި ހިންގަމުންދާ އުމްރާނީ ބޮޑެތި ގިނަ މަޝްރޫއުތަކަކީވެސް އިންޑިއާގެ އެހީތެރިކަމާއެކު ހިންގާ މަޝްރޫއުތަކެއް ކަމަށެވެ. 

އޭގެ ތެރެއިންވެސް ހަނިމާދޫ އިންޓަރނޭޝަނަލް އެއަރޕޯޓު ތަރައްގީ ކުރުމުގެ މަޝްރޫއަކީ އިންޑިއާގެ އެހީތެރިކަމާއެކު ހިންގަމުންދާ އެންމެ ބޮޑު މަޝްރޫއުކަމަށް ފޮރިން މިނިސްޓަރު ޝާހިދު ވަނީ ވިދާޅުވެފައެވެ. 

އެއަރޕޯޓު މަޝްރޫއުގެ އިތުރުންވެސް ފެނާއި ނަރުދަމާއާއި، މަގު ހެދުން ފަދަ އެތައް މަޝްރޫއެއް އިންޑިއާގެ އެހީތެރިކަމުގައި ރާއްޖޭގެ އެކި ހިސާބުތަކުގައި ކުރިއަށް ގެންދާކަން މިނިސްޓަރުގެ ވާހަކަފުޅުގައި ވަނީ ފާހަގަކުރައްވާފަ އެވެ.