އެމްޓީސީސީއިން ވިލިމާލެއަށް މިނީ ބަސްތައް އެރުވީ ސިޓީ ކައުންސިލްއަށް އެންގުމަކާއި ނުލާ ވަގަށްކަމަށް މާލޭ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެ އެވެ. 

ވިލިމާލޭގެ ވެއްޓާއި ގުޅޭގޮތަށް ބަގީ ޚިދުމަތް ފެށުމަށް މާލޭ ސިޓީ ކައުންސިލުން ތައްޔާރުވެފައި ވަނިކޮށް އެ ރަށުގައި މިނީބަސް ފެށުމަށް ސަރުކާރުން ނިންމުމާއި ގުޅިގެން، ކައުންސިލުން ނުރުހުން ފާޅުކުރަމުން ދަނިކޮށް ސަރުކާރު ކުންފުނިން ވަނީ ބަސްތައް ވިލިމާލެއަށް އަރުވާފަ އެވެ. 

އެކަމާއި ގުޅޭގޮތުން މޭޔަރު މުއިއްޒު ކުރެއްވި ޓްވީޓެއްގައި ވިދާޅުވީ ވިލިމާލެއަށް ބަސްތައް އަރުވާފައިވަނީ ކައުންސިލްގެ ހުއްދަ ނުހޯދާ ރޭގަނޑު ދަންވަރުގެ ވަގުތެއްގައި ކަމަށެވެ. 

Advertisement

އެއީ ގަވައިދާއި ޚިލާފަށް ކޮށްފައިވާ ކަމެއްކަމަށް ވާތީ އެކަން ފުލުހުންގެ އިދާރާއާއި ލޯކަލް ގަވަމަންޓު އޮތޯރިޓީގެ ސަމާލުކަމަށް ގެނެސްފައިވާކަމަށް މުއިއްޒު ވިދާޅުވިއެވެ. 

ވިލިމާލެއަށް އަރުވާފައި ހުރި އެމްޓީސީސީގެ މިނީ ބަސްތައް 

އޭގެ އިތުރުން މުއިއްޒު ވިދާޅުވީ ވިލިމާލޭގައި ބަގީގެ ޚިދުމަތް ފެށުމަށް ތައްޔާރުވެފައި ވަނިކޮށް، މި ދަނޑިވަޅުގައި ބަސްތަކެއް ވިލިމާލެއަށް އެރުވީ އެމްޑީޕީގެ ރިޔާސީ ޕްރައިމަރީއަށް ނުފޫޒު ފޯރުވުމަށް ކަމަށެވެ. 

ސައުންސިލްގެ މަސައްކަތުގެ ތެރެއަށް ސަރުކާރު ކުންފުންޏަކުން ވަދެ، ހުރަސްތައް އަޅަމުން ދިއުމަކީ ލާމަރުކަޒީ ގާނޫނު ފުނޑާލުންކަމަށް ސިފަކުރައްވާ މޭޔަރު މުއިއްޒު ވަނީ ބޮޑެތި ފާޑުކިޔުންތަކެއް އަމާޒުކުރައްވާފަ އެވެ.