ބަރުލަމާނީ ނިޒާމެއްގައި، ދިވެހިރާއްޖޭގެ ބޮޑުވަޒީރު ކަމުގެ މަގާމަށް ކުރިމަތި ލައްވާނެ ކަމަށް ރައްޔިތުންގެ މަޖިލީހުގެ ނައިބު ރައީސް އީވާ ވިދާޅުވެއްޖެއެވެ.
އީވާ މިފަދައިން ވިދާޅުވެފައި ވަނީ "ސޯސަލް" އިން ގެނެސްދިން އިންޓަވިޔުއެއްގައި އޭނާ އާއި ކުރި ސުވާލަކަށް ޖަވާބު ދެއްވަމުންނެވެ.
އެގޮތުން އެ އިންޓަވިއުގެ ތެރެއިން، ރާއްޖޭގެ ރައީސުލްޖުމްހޫރިއްޔާ ކަމަށް ކުރިމަތި ލައްވާނަންތޯ ކުރި ސުވާލަކަށް ޖަވާބު ދެއްވަމުން އީވާ ވަނީ ބަރުލަމާނީ ނިޒާމެއްގައި ބޮޑުވަޒީރު ކަމަށް އޭނާ ކުރިމަތި ލައްވާނެ ކަމަށް ވިދާޅުވެފައެވެ.
"ބަރުލަމާނީ ނިޒާމެއްގައި ބޮޑުވަޒީރު ކަމަށް އަޅުގަނޑު ކުރިމަތިލާނަން. ރިޔާސީ ނިޒާމަކީ އަޅުގަނޑު ގަބޫލުކުރާ އެއްޗެއް ނޫން." އިވާ ވިދާޅުވި އެވެ.
މީގެ އިތުރުން ވެސް މި އިންޓަވިއުގައި އީވާ ވަނީ އޭނާ، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް ތާއީދު ކުރައްވަނީ އެމަނިކުފާނަކީ ވިޝަނަރީ ބޭފުޅެއް ވީމާ ކަމަށާ، ވެރިކަމަށް ވަޑައިގެން އެމަނިކުފާނު ކުރައްވާފައިވަނީ ޚިޔާލަށްވެސް ނުގެނެވޭ ވަރުގެ ކަންކަން ކަމަށް ވިދާޅުވެފައެވެ.
އެގޮތުން، އާސަންދަ އާއި، އެކަނިވެރި މައިންނާއި ބަފައިންނަށް އިނާޔަތް ދިނުމާއި، އަދި ދޮށީ އުމުގެ މީހުންނަށް އިނާޔަތް ދިނުމުގެ މަސައްކަތް އޭނާ ފާހަގަކުރެއްވިއެވެ.
އީވާ ވިދާޅުވީ، ކޮންމެ ރަށެއްގެ ރައްޔިތުންނަށް ވެސް ރައީސް ނަޝީދު ކޮށްދެއްވާނެ ކަންކަމުގެ ލިސްޓަކާއި އެކަން ކުރާނެ ގޮތް އެމަނިކުފާނަށް އެނގިވަޑައިގަންނަވާނެ ކަމަށާ، ރައީސް ނަޝީދު ގައުމާއިމެދު ވިސްނަވާވަރަށް އެހެން އެއްވެސް ސިޔާސީ ލީޑަރެއް އެހެން އެއްވެސް ސިޔާސީ ލީޑަރެއް ވިސްނަވާތަން ނުފެންނަ ކަމަށެވެ.
ރިޔާސީ ނިޒާމް ގަބޫލު ނުކުރައްވާ ކަމަށް ވިދާޅުވެ، ބޮޑުވަޒީރު ކަމަށް ކުރިމަތި ލައްވާނެ ކަމަށް އީވާ ވިދާޅުވެފައި ވާއިރު، އޭނާ އެންމެ ތާއީދު ކުރައްވާ ސީޔާސީ ލީޑަރު، ރައީސް ނަޝީދަކީ ވެސް ރާއްޖެއަށް ބަރުލަމާނީ ނިޒާމް ގެނެސް، ބޮޑު ވަޒީރު ކަމުގެ މަގާމަށް ވަޑައިގެންނެވުމަށް ގިނަ މަސައްކަތްތަކެއް ކޮށް ހުވަފެން ދެކެމުން އަންނަ ބޭފުޅެކެވެ.
އެގޮތުން، ދާދިފަހުން އޮތް އެމްޑީޕީގެ ކޮންގްރެސް ގައިވެސް ވެރިކަން ކުރުމުގެ ނިޒާމް ބަރުލަމާނީ ނިޒާމަކަށް ބަދަލުކުރުމަށް އެމަނިކުފާނު ވަނީ ގަރާރެއް ހުށަހަޅުއްވާފައެވެ. އެކަމާއި ގުޅިގެން، އެމްޑީޕީގެ ތެރޭގައި ވަރަށް ބޮޑު ހަމަނުޖެހުން ތަކެއް އުފެދިފައިވާއިރު، ކޮންގްރެސް ގެ ތެރެއިން ރައީސް ނަޝީދު ބަނީ އެ ގަރާރު އަނބުރާ ގެންދަވާފަ އެވެ.
Advertisement
This content is created and paid for by advertisers and does not involve Voice Journalists
