ކުރީގެ ރައީސް ޔާމީން އަބްދުލްގައްޔޫމް ގެ ވެރިކަމުގައި އަދުގެ ހޯމް މިނިސްޓަރު އަދި އަދާލަތު ޕާޓީގެ ރައީސް އިމްރާން ޖަލަށް ލައިގެން އިހާނަތިކޮށް ކަންތައްތައް ކޮށްފައިވާ ކަމަށް އޭނާ ވިދާޅުވުމުން ޕީއެންސީގެ ރައީސް އަބްދުއްރަހީމް (އަދުރޭ) ގެ ބަހުގެ ހަމަލާތަކެއް އޭނާ އަށް ރައްދު ކުރައްވައިފި އެވެ.
ޖަލުގައި ހުކުމް ތަންފީޒުކުރައްވަމުން ގެންދަވާ ކުރީގެ ރައީސް އަދި އިދިކޮޅު ކޯލިޝަންގެ ރިޔާސީ ކެންޑިޑޭޓް ޔާމީނާއި، ޕީޕީއެމް-ޕީއެންސީ ކޯލިޝަންގެ އިސްވެރިން ބައްދަލުކުރެއްވުމަށް ފަހު އަދުރޭ ކުރެއްވި ޓްވީޓެއްގައި އޭނާ ވަނީ ރައީސް ޔާމީން ހުންނެވީ ގަދަކޮށްކަމަށް ވިދާޅުވެފައެވެ.
އަދުރޭގެ އެ ޓުވީޓަށް ރައްދު ދެއްވައި އިމްރާން ވަނީ އެކަމުން އެނގިގެން ދަނީ އޭނާ ޖަލުގައި ހުރި އިރު ކިތަންމެ އިހާނަތިކޮށް ކަންކުރި ނަމަވެސް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ހިތްތިރިކަމާއި އޯގާތެރިކަން ކަމަށް ވިދާޅުވެފައެވެ. އަދި މީ ސަރުކާރުން ޒާތީވެ ބަދަލު ހިފުމުގެ ރޫހު ނުގެންގުޅޭކަން އެނގިގެންދާކަމެއްގެ ގޮތުގައި އިމްރާން ވަނީ ސިފަކުރައްވާފައެވެ.
ޢިމްރާން ގެ އެވާހަކަ ތަކަށް ރައްދުދެއްވައި އަދުރޭ ކުރެއްވި ޓުވީޓެއްގައި އޭނާ ވަނީ، އިމްރާން ހުކުމް ތަންފީޒް ކުރަމުން ދިޔައިރު، ގޭ ބަންދަށް ބަދަލުކޮށް ގޭގައި ހުރެގެން ފެންކުޅި ކުޅެ މަޖާކުރި ހަނދާން މިހާރު ނެތްތޯ ސުވާލު ކުރައްވާފައެވެ.
"ބަލަ ޢީދު ރޯދައަށާ އަންހެނުން ވިހަށް ވާއިރަށް ގެ އަށް ބަދަލުކުރި ހަނދާން އެބަހުރިތަ؟ ގޭގައި ހުރެގެން ފެންކުޅި ކުޅެ މަޖާކުރި ހަނދާން މިހާރަކު ނެތްދޯ؟ ޖަލުގައި ތިބެގެން އެކުވެރިންނާއެކު ސެލްފީ ނަގާ އުޅުނު ހަނދާން މިހާރު ނެތީދޯ؟" އަދުރޭ ވިދާޅުވިއެވެ.
އެމްއެމްޕީއާރުސީ މެދުވެރިކޮށް ވ. އާރަށް ކުއްޔަށްދިނުމުގައި ރިޝްވަތު ނަންގަވާ އެ ފައިސާ ލޯންޑަރކުރި ކުށް ރައީސް ޔާމީންގެ މައްޗަށް ސާބިތުވާ ކަމަށް ކަނޑައަޅައި 5 މިލިއަން ޑޮލަރުން ޖޫރިމަނާކޮށް 11 އަހަރުގެ ޖަލު ހުކުމެއް އިއްވީ މިދިޔަ ޑިސެމްބަރު މަހުގެތެރޭގައެވެ. މި ހުކުމުގެ ސަބަބުން ކުރިޔަށް އޮތް ރިޔާސީ އިންތިޚާބުގައި ވާދަކުރެެއްވުމުގެ ފުރުސަތު ޔާމީނަށް ވަނީ ހަނިވެފައެވެ.
Advertisement
This content is created and paid for by advertisers and does not involve Voice Journalists
