އެމްޑީޕީގެ ރިޔާސީ ޕްރައިމަރީގެ ކެމްޕޭނަށް ރައީސް އިބްރާހިމް މުހައްމަދު ސާލިޙު މާދަމާ ފުވައްމުލަކާއި ހުވަދު އަތޮޅަށް ވަޑައިގަންނަވަން ނިންމަވައިފިއެވެ.

ރައީސް އޮފީހުގެ ތަރުޖަމާން މިއުވާން މުހައްމަދު ވިދާޅުވީ ރައީސް ސާލިޙު ރިޔާސީ ޕްރައިމަރީގެ ކެމްޕޭނަށް މާދަމާ ފުވައްމުލަކާއި ހުވަދު އަތޮޅަށް ވަޑައިގަންނަވާ ގޮތަށް ހަމަޖެހިފަައިވާ ކަމަށެވެ. 

ޕްރައިމަރީގެ ކެމްޕެއިނަށް ރައީސް ޞާލިހު ހުވަދު އަތޮޅާއި ފުވައްލަކަށް ވަޑައިގަންނަވަން ހަމަޖެހިފައިވާއިރު، މި ނިމުނު ހަފްތާގައި އެމަނިކުފާނު ވަނީ ބޮޑު ތިލަދުންމައްޗަށާއި، ށ އަދި ލ އަތޮޅަށް ވެސް ވަޑައިގެންފައެވެ. 

އެއަށްފަހު މިރޭ އެމަނިކުފާނު ބައިވެރިވެވަޑައިގަންނަވާ ކެންޕެއިން ޖަލްސާއެއް މާލޭގައިވެސް ބޭއްވުމަށް ވަނީ ހަމަޖެހިފައެވެ. 

އެމްޑީޕީގެ ރިޔާސީ ޕްރައިމަރީ ބާއްވަން ގާތްގަނޑަކަށް 8 ދުވަހަށް ވެފައިވާއިރު، ޕްރައިމަރީގައި ރައީސް ޞާލިހާއި ވާދަކުރައްވާ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވެސް އަންނަނީ މާލެއާއި އަތޮޅު ތެރޭގައި ކެންޕެއިން ހަރަކާތްތައް ކުރިއަށް ގެންދަމުންނެވެ.