ކުޑަ އަންހެން ކުއްޖަކު ރޭޕު ކޮށް ބަރަހަނާ ފޮޓޯ ނެގި މައްސަލައެއް ސާބިތުވި މީހެއް 40 އަހަރު ދުވަހަށް ޖަލަށް ލާން ހުކުމް ކުރުމާއި ގުޅިގެން ކޮމިޝަނަރ އޮފް ޕޮލިސް މުހައްމަދު ހަމީދު މި މައްސަލަ ތަަހުގީގުކުރި ފުލުހުންގެ ޓީމަށް ތައުރީފް ކުރައްވައިފި އެވެ.

ލ. ކަލައިދޫ ދަނޑުބިން ސަރަހައްދު ވަލުތެރެއަށް 2018 ވަނަ އަހަރުގެ ޖެނުއަރީ ހަވަނަ ދުވަހުގެ މެންދަމުގެ ވަގުތެއްގައި އުމުރުން 17 އަހަރުގެ އަންހެން ކުއްޖަކު ގެންގޮސް، ގަދަކަމުން ޖިންސީ ގުޅުން ހިންގައި، ބަރަހަނާ ފޮޓޯ އާއި ވީޑިއޯ ނެގިކަން އެރަށު މާކަރީލައިޓް، މުހައްމަދު ޝަޒްލީފް ނަމަކަށް ކިޔާ މީހެއްގެ މައްޗަށް ސާބިތުވާ ކަން ކަނޑައަޅައި އޭނާއަށް 40 އަހަރުގެ ޖަލު ހުކުމެއް ކްރިމިނަލް ކޯޓުން ވަނީ އިއްވާފައެވެ.  

އެކަމާއި ގުޅިގެން ހަމީދު ކުރެއްވި ޓްވީޓެއްގައި އޭނާ ވަނީ، މި މައްސަލަ ބެލުމުގައި އިސްކޮށް ހަރަކާތްތެރިވި ލ. ގަމު ޕޮލިސް ސްޓޭޝަނުގެ ސީނިއަރ ސާޖެންޓު ހުސެއިން އާދިލްގެ މި ތަހުގީގުގައި ކުރި މަސައްކަތް ފާހަގަކުރައްވާފަ އެވެ.

އަދި, އެ ކުއްޖާއަށް ލިބުނު އަނިޔާގެ ހައްގު އަދަބު ދެވުމުން ދޭހަވަނީ އަންހެނުންނާއި ކުޑަކުދިންނަށް ކުރާ މިފަދަ އަނިޔާތަކާ ދެކޮޅަށް ފުލުހުން މަސައްކަތް ކުރާ މިންވަރުކަން ވެސް ސީޕީ ފާހަގަ ކުރެއްވި އެވެ.

ޝަޒްލީފްގެ މައްޗަށް ދައުލަތުން އުފުލާފައިވަނީ، ރޭޕުކުރުމުގެ ކުށާއި، ކުޑަކުއްޖަކު މެދުވެރިކޮށް އޮރިޔާން ކާޑު އުފެއްދުމުގެ ކުށުގެ ދައުވާ އެވެ.  

މި ދެ ދައުވާވެސް އޭނާގެ މައްޗަށް ސާބިވާ ކަމަށް ކަނޑައަޅައި މިމަހު 18 ވަނަ ދުވަހު ކްރިމިނަލް ކޯޓުން ކުރި ހުކުމް ގައި ރޭޕުގެ ކުށުގެ ދައުވާ ސާބިތުވުމުން އޭނާ 20 އަހަރަށް ޖަލަށްލާން ހުކުމް ކޮށްފައިވާއިރު، ކުޑަކުއްޖަކު މެދުވެރިކޮށް އޮރިޔާންކާޑު އުފެއްދުމުގެ ކުށުގެ ދައުވާ ސާބިތުވުމުން ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްސަ އުސޫލުތަކުން އަމަލުކުރުމުގެ ޤާނޫނު ދަށުން އޭނާގެ މައްޗަށް 20 އަހަރުގެ ޖަލު ހުކުމެއް އިއްވާފައިވެއެވެ.