އެމްޑީޕީގެ ރިޔާސީ ޕްރައިމަރީގެ ކެމްޕެއިނަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ކ. ގުރައިދޫ އަށް ވަޑައިގެންފި އެވެ.
ރައީސް ސާލިހަށް މަރުހަބާ ދެންނެވުމަށް ގުރައިދޫގެ އެމްޑީޕީގެ މެންބަރުން ގެ ތެރެއިން އެމަނިކުފާނަށް ތާއީދު ކުރައްވާ ގިނަ ބަޔަކު ވަނީ ލަފާ ސަރަހައްދަށް އެއްވެފައެވެ.
ރައީސް ގެ މިދަތުރު ފުޅުގައި ގުރައިދޫގެ އެމްޑީޕީ މެންބަރުންނާއި ބައްދަލު ކުރައްވާނެވެ.
ގުރައިދޫގެ މި ދަތުރު ފުޅަށްފަހު ދެން ރައީސް ވަޑައިގަންނަވާނީ ކ. ކާށިދޫއަށެވެ. ކާށިދޫގެ ދަތުރުފުޅުގައިވެސް އެރަށުގެ އެމްޑީޕީ މެންބަރުންނާއި އެމަނިކުފާނު ބައްދަލު ކުރައްވާނެވެ.
މި ދެ ދަތުރުފުޅުގައިވެސް އެމަނިކުފާނުގެ އަރިހުގައި ސަރުކާރުގެ އިސްބޭފުޅުން ބައިވެރިވެވަޑައިގަންނަވައެވެ.
މިމަހު 28 ގައި މި ޕްރައިމަރީ އޮންނައިރު، ރައީސް ޞާލިހާއި، އެމަނިކުފާނާއި ވާދަކުރައްވާ ކުރީގެ ރައީސް މުހައްމަދު ނަޝީދު ވެސް ވިދާޅުވަމުން އަންނަނީ އެ ދެބޭފުޅުންނަށްވެސް ޕްރައިމަރީ ކާމިޔާބު ކުރެވޭނެ ކަމުގެ ޔަގީންކަން އޮތް ކަމަށެވެ.
އަދި ރައީސް ޞާލިހު ދެވަނަ ދައުރަކަށް ކުރިމަތި ލެއްވީ އެމްޑީޕީ އަށް ވެރިކަން ހޯދައި ދެއްވަން ކަމަށް އެމަނިކުފާނު ވިދާޅުވާއިރު، ރައީސް ނަޝީދު ވިދާޅުވީ ރައީސް ޞާލިހު ރިޔާސީ އިންތިހާބުގައި ވާދަކުރައްވާނަމަ ފުރަތަަމަ ބުރުން އެމްޑީޕީ ބަލިވާނެކަމަށެވެ.
Advertisement
This content is created and paid for by advertisers and does not involve Voice Journalists
