ޖަޒީރާ ވަންތަ ދިވެހިރާއްޖެއަކީ އެމްޑީޕީގެ އެންމެ މުހިންމު އެއް ސިޔާސަތު ކަމަށާ، އެހެން ނަމަވެސް، މިހާރު، އެ މުހިންމު ސިޔާސަތު ކަމުނުދާ މެންބަރުން ޕާޓީގައި އެބަތިބި ކަމަށް، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ. 

އަންނަ ހޮނިހިރު ދުވަހު ބާއްވާ އެމްޑީޕީގެ ރިޔާސީ ޕްރައިމަރީގެ ކެމްޕެއިނަށް ކ. ގުރައިދޫ އަށް ވަޑައިގެން އެރަށުގެ އެމްޑީޕީ މެންބަރުންނާއި ބައްދަލު ކުރައްވައި ވާހަކަ ދައްކަވަމުން ރައީސް ޞާލިޙު ވިދާޅުވީ، އެމްޑީޕީގެ ސިޔާސަތަކީ ޖަޒީރާ ރާއްޖެއެއް ތަރައްޤީ ކުރުން ކަމަށެވެ. 

"ވަކިވަކި ރަށްތައްވެސް ތަރައގީ ކުރުން. ރައްޔިތަކު ދިރިއުޅޭ ކޮންމެ ރަށެއްގައި ދިރިއުޅޭ ރައްޔިތުންނަށް އަސާސީ ޚިދުމަތްތައް ފޯރުކޮށްދީގެން ނޫނިއްޔާ، ރަށްރަށަކު ވަޒަންވެރިވެ، އިގްތިސާދެއް ބިނާއެއް ނުކުރެވޭނެ. އެގޮތުން ރަށްރަށުގައި ފެނާއި ނަރުދަމާ އާއި، ކަރަންޓާއި އަދި މަގުތައް ހެދުމާއި މިހިން ހުރި، އަސާސީ ހިދުމަތްތައް ފޯރުކޮށްދިނުމާއި އެކީގައި ޒުވާނުންނަށް ބޭނުންވާ ކުޅިވަރު ކުޅެވޭނެ ތަންތަން ތަރައްގީކޮށް، ސިއްހީ ޚިދުމަތްތައް ގާތުން ލިބޭނެގޮތް ހޯދައިދީ، ތައުލީމް ދަރިވަރުންނަށް ލިބޭނެ ހޯދައި ދިނުމަށް އަޅުގަނޑުމެން މަސައްކަތް މިކުރަނީ." ރައީސް ޞާލިހް ވިދާޅުވިއެވެ. 

Advertisement

އެހެން ނަމަވެސް ޕާޓީގެ އެ މުހިންމު ސިޔާސަތު އެއީ މިހާރު ކަމުނުދާ ސިޔާސަތެއް ކަމަށް ފެންނަ ބައެއް މީހުން ޕާޓީތެރޭގައި މިހާރު އެބައުޅޭ ކަމަށްވެސް ރައީސް ޞާލިހް ވިދާޅުވިއެވެ. 

ރައީސް ޞާލިހް ވިދާޅުވީ، އެމްޑީޕީގެ ސިޔާސަތަކީ ޖަޒީރާ ރާއްޖެއެއް ތަރައްޤީ ކުރުން ކަމަށްވާއިރު، އެކަމާއި ދެކޮޅަށް ވާހަކަ ދައްކަވާ ބޭފުޅުން އެފަދައިން ވާހަކަ ދައްކަވަނީ އެމްޑީޕީގެ ސިޔާސަތުތައް ތަންފީޒުކުރުމަށް ނޫން ކަމަށާ، އެއީ އެހެން މަގުސަދެއްގައި ދައްކަވާ ވާހަކަތަކެއް ކަމަށެވެ. 

އެހެންކަމުން ކުރިއަށް އެމްޑީޕީ ޕްރައިމަރީގައި ކެންޑިޑޭޓެއް ކަނޑައެޅުމަށް ވޯޓުލާއިރު، އެކަމާއި މެދު ވިސްނައި އެމްޑީޕީގެ ސިޔާސަތުތައް ތަންފީޒުކުރުމަށް މަސައްކަތް ކުރާ މީހަކަށް ވޯޓުދިނުމަށް ރައީސް ޞާލިހް ވަނީ އެދިވަޑައިގެންފަ އެވެ.