ރ. ފައިނުގައި އެއަރޕޯޓު އަޅަން ބޭނުންކަމަށްބުނެ އާއްމުން ޓީމަކުން އެރަށު ކައުންސިލާ ބައްދަލު ކޮށްފިއެވެ.
"ވޮއިސް" އަށް މައުލޫމާތު ދެއްވަމުން ފައިނު ކައުންސިލްގެ ރައީސް މޫސާ އުމަރު މަނިކު ވިދާޅުވީ، ބައްދަލުވުން ބޭއްވީ އާއްމުންގެ ބައެއްގެ އެދުމުގެ މަތިން ކަމަށާއި، ރަށާ ގުޅުންހުރި މިފަދަ ކަންކަމުގައި ރައްޔިތުންގެ ހިޔާލަށް އަބަދުވެސް މަރުހަބާ ކިޔާ ކަމަށެވެ.
އިއްޔެ ހެނދުނު ފައިނު ކައުންސިލްގައި ކުރިއަށްދިޔަ މި ބައްދަލުވުމުގައި އާއްމުންގެ 10 މީހުން ބައިވެރި ވެފައި ވާކަމަށް މޫސަ ވިދާޅުވިއެވެ.
"އެއާޕޯޓެއް އަޅަން ފުރުސަތު މިހާރު އޮތް ހެން ހީވާތީ އެކަން ބޭނުންވާ ވާހަކަ (ދެންނެވީ)،" މޫސަ ވިދާޅުވިއެވެ.
މޫސަ ވިދާޅުވީ އެ މަޝްވަރާގައި، އެއަރޕޯޓެއް އެޅުމުން ލިބޭނެ ފައިދާތަކާއި ގެއްލުމާއި އަދި އޭގައި ހުރި އެހެނިހެން ކަންކަމާމެދު މަޝްވަރާ ކޮށްފައި ވާނެ ކަމަށް މޫސަ ވިދާޅުވިއެވެ.
ބައްދަލުވުމުގެ ބައިވެރިން ފާހަގަ ކުރި ގޮތުގައި، ރ. އަތޮޅުގެ ދެކުނު ބިތުގެ މީހުން ދިރިއުޅޭ ރަށެއްގައި އެއާޕޯޓު އަޅުއްވާނެ ދަފަ މޭރުމަކުން ރައީސް ޞާލިހު ވާހަކަފުޅު ދައްކަވާފައި ވެއެވެ.
އެހެންކަމުން އެ ފުރުސަތު އެންމެ ބޮޑީ، އެ އަތޮޅުގެ ދެކުނު ބިތުގައި އޮތް އެންމެ ބިން ބޮޑު ދެރަށް ކަމަށްވާ ފައިނާއި ކިނޮޅަހަށް ކަމަށް ބައްދަލުވުމުގެ ބައިވެރިން ފާހަކަ ކުރިއެވެ.
މީގެ ކުރީގެ ސަރުކާރުތަކުންވެސް ފައިނުގައި އެއަރޕޯޓް އަޅަން މަސައްކަތް ކޮށްފައިވާ ކަމަށާއި، ނަމަވެސް ރަށުގެ ބައެއް އާއްނު ރައްޔިތުން އެކަން ސިޔާސީ ކޮށް، އެކަމަށް ހުރަސް އަޅާފައި ވާކަމަށް އާއްމުންގެ ޓީމުން ބުންޏެވެ. ނަމަވެސް އެއާޕޯޓަކީ ރަށަށް ފައިދާހުރި މަޝްރޫއެއް ކަމަށް އާއްމުން ފާހަގަ ކުރިއެވެ.
Advertisement
This content is created and paid for by advertisers and does not involve Voice Journalists
