ހދ. ކުޅުދުއްފުށީ ރީޖަނަލް ހޮސްޕިޓަލްގެ އޯޕީޑީ އިމާރާތުގެ މަޝްރޫޢުގެ މަސައްކަތް ނިމި އެ ތަނުގެ ބޭނުން ކުރަން ފަށައިފިއެވެ. 

މިނިސްޓްރީ އޮފް ހެލްތުގެ ފަރާތުން އެމްޓީސީސީ އާއި ހަވާލުކޮށްގެން ކުރިއަށް ގެންދިޔަ ހދ. ކުޅުދުއްފުށީ ރީޖަނަލް ހޮސްޕިޓަލްގެ އޯޕީޑީ އިމާރާތް ކުރުމުގެ މަޝްރޫޢުއަކީ 20.2 މިލިއަން ރުފިޔާގެ މަޝްރޫޢެކެވެ. 

ކުޅުދުއްފުއްޓަކީ މުޅި ހއ. ހދ. އަދި ށ. މި ތިން އަތޮޅުގައި ދިރިއުޅޭ ގާތްގަނޑަކަށް 72,000 ރައްޔިތުން އެކި ޚިދުމަތް ހޯދުމަށާއި، އެހެނިހެން ބޭނުންތަކުގައި އައިސް ހަދައި އުޅުމަށް މުޙިންމު ރަށެކެވެ. އެގޮތުން މި ރަށަށް ބޮޑުތިލަދުންމަތީ ރައްޔިތުން އެންމެ ގިނައިން އަންނަ އެއް ބޭނުމަކީ މި ރަށުގައި ހުރި ރީޖަނަލް ހޮސްޕިޓަލްގެ ޚިދުމަތް ހޯދުމެވެ. އަދި، ކުޅުދުއްފުށި ހޮސްޕިޓަލްއަކީ މުޅި ބޮޑު ތިލަދުންމަތީގައިވެސް މިވަގުތު ހަމައެކަނި ހުރި ޓަރޝިއަރީ ފެންވަރަށް ތަރައްޤީކުރެވިފައިވާ ހޮސްޕަޓަލްކަމުން، އެހެން ހޮސްޕިޓަލްތަކުން ނުލިބޭ އެކި އެކި މުހިންމު ޚިދުމަތް ހޯދުމަށް ބޮޑުތިލަދުންމަތީގެ ވަރަށް ގިނަ ރައްޔިތުން މި ހޮސްޕިޓަލްއަށް ބަރޯސާވެއެވެ.

އެހެންކަމުން، އަލަށް ބޭނުން ކުރަން މި ފެށުނު ކުޅުދުއްފުށީ ރީޖަނަލް ހޮސްޕިޓަލްގެ އޯޕީޑީ އިމާރާތުގެ ސަބަބުން މި ހޮސްޕިޓަލް އިތުރަށް ތަރައްޤީވެ، ބޮޑު ތިލަދުންމަތީގެ ރައްޔިތުންނަށް ސިއްޙީ ޚިދުމަތް ހޯދުމުގައި އިތުރު ލުއިފަސޭހަކެމެއް ލިބިގެން ވަނީ ގޮސްފައެވެ.

ކުޅުދުއްފުށީ އޯޕީޑީ އިމާރާތް ކުރުމުގެ މި މަޝްރޫޢުގެ ދަށުން، 21 ބަލިމީހުން ބަލާ ކޮޓަރި އިމާރާތް ކުރުމާއި، 1 ފަރުވާދޭ ކޮޓަރި އިމާރާތް ކުރުމާއި، 1 ޕްރޮސީޖަރ ކޮޓަރި އިމާރާތް ކުރުމާއި، 1 ނަރސިންގ ސްޓޭޝަން ހެދުމާއި 189,6 އަކަ ފޫޓުގެ ވެއިޓިންގ ލޯންޖެއް ހެދުމާއި، 32 ޑިސްޕްލޭ ހުންނަ ކިއު ސިސްޓަމެއް ބެހެއްޓުމާއި، ސީސީޓީވީ ކެމެރާ ސިސްޓަމެއް ހަރުކުރުމުގެ މަސައްކަތް ވެސް ކުރެވިފައިވާ ކަމަށް އެމްޓީސީސީން މީގެ ކުރިން ބުނެފައި ވެއެވެ.