އިއްޔެ ނިމިގެންދިޔަ އެމްޑީޕީގެ ރިޔާސީ ޕްރައިމަރީ އިންތިޚާބުގެ ނަތީޖާއިން އެނގިގެން ދިޔައީ އެމްޑީޕީގެ މެންބަރުން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ތަރައްޤީ އަށް ކުރާ އިތުބާރު ކަމަށް ނާއިބު ރައީސް ފައިސަލް ނަސީމް ވިދާޅުވެއްޖެއެވެ.
ނާއިބު ރައީސް މިފަދައިން ވިދާޅުވީ، އެމްޑީޕީގެ ރިޔާސީ ޕްރައިމަރީ ރައީސް ޞާލިހް ކާމިޔާބު ކުރެއްވުމާއި ގުޅިގެން އެކަމަށް މަރުހަބާ ދަންނަވައި ކުރެއްވި ޓްވީޓެއްގައެވެ.
ނާއިބު ރައީސް ވިދާޅުވީ، މި ނަތީޖާއިން އެނގިގެން ދިޔައީ ރަށްރަށުގެ މެދުގައި ތަފާތު ކުރުމެއްނެތި، ހުރިހާ ރަށަކަށް ވެސް ތަރައްގީ ގެނެސްދިނުމަށް ރައީސް ޞާލިހު ކުރައްވަމުން ގެންދަވާ މަސައްކަތަށް އެމްޑީޕީގެ މެންބަރުން ކުރާ އިތުބާރު ކަމަށެވެ.
އިއްޔެ ބޭއްވި އެމްޑީޕީގެ ރިޔާސީ ޕްރައިމަރީގެ ވަގުތީ ނަތީޖާ މިހާރު އިއުލާން ކޮށްފައިވާއިރު އިންތިޚާބު ގެ ނަތީޖާ ދައްކާގޮތުން ރައީސް ޞާލިހަށް ލިބިފައިވަނީ %61 ވޯޓެވެ. އަދި އިންތިޚާބު ގައި އެމަނިކުފާނާއި ވާދަކުރެއްވި އެމްޑީޕީގެ ރައީސް މުހައްމަދު ނަޝީދަށް ލިބިފައިވަނީ %39 ވޯޓެވެ.
އެއާއެކު މިއަހަރުގެ ސެޕްޓެމްބަރު މަހު ބާއްވާ ރިޔާސީ އިންތިހާބުގައި އެމްޑީޕީގެ ޓިކެޓްގައި ނުކުންނާނީ ރައީސް ޞާލިހު ކަން މިހާރު ވަނީ ކަށަވަރުވެފައެވެ.
Advertisement
This content is created and paid for by advertisers and does not involve Voice Journalists
