ކ. ތުލުސްދޫ ކައިރިއަށް ސްނޯކްލިންއަށް ގޮސް އޮތް ފަތުރުވެރިއެއް ގައިގައި ދުއްވާފައި ދިޔަ ލޯންޗަކުން ޖެހިގެން ލިބުނު އަނިޔާގައި، އެމީހާ ނިޔާވެއްޖެ އެވެ. 

ތުލުސްދޫ ކައުންސިލްގެ ރައީސް އަސްލަމް "ވޮއިސް" އަށް މައުލޫމާތު ދެއްވަމުން ވިދާޅުވީ މި ހާދިސާ ހިނގާފައިވަނީ މިއަދު ހެނދުނު ގާތްގަނޑަކަށް 11:00 ކަންހާއިރު ކަމަށެވެ. 

އަދި މި ހާދިސާގައި ނިޔާވެފައި ވަނީ ފިރިހެނެއް ކަމަށާ، އޭނާ އަކީ އެރަށު ހުންނަ ގެސްޓްހައުސް އަކަށް އައިސް ހުރި ބޭރުގައުމުގެ ފަތުރުވެރިއެއް ކަމަށެވެ. ނަމަވެސް އޭނާގެ އުމުރާއީ އޭނާ އަކީ ކޮން ގައުމެއްގެ މީހެއް ކަން އަދި ސާފު ނުވާ ކަމަށްވެސް އޭނާ ވިދާޅުވި އެވެ. 

Advertisement

މީގެ އިތުރުން އަސްލަމް ވިދާޅުވީ، އެމީހާ ސްނޯކްލިން އަށް ދިޔައީ އިތުރު ހަތަރު ވަރަކަށް މީހުންނާއި އެކުގައި ކަމަށާ، އެ ސްނޯކްލިން އަށް ގޮސް އޮތް ސަރަޙައްދަކީ ކަނޑުއޮޅި ކަމުން ގިނަ އަދަދެއްގެ ލޯންޗު އަބަދުވެސް އެ ސަރަހައްދުން އަބަދުވެސް ދަތުރުކޮށް އުޅޭ ކަމަށެވެ. 

އަދި ދުއްވާފައި ދިޔަ ލޯންޗުން ޖެހުމުގެ ސަބަބުން އެ މީހާގެ އަތެއްވެސް ބުރިވެގެން ހަށިގަނޑާއި ވަކިވެފައިވާކަމަށާ، މޫދުން ނެގި އިރުވެސް އޭނާ އޮތީ ނިޔާވެފައި ކަމަށް އަސްލަމް ވިދާޅުވި އެވެ. 

ނިޔާވެފައިވާ ފަތުރުވެރިޔާ ރާއްޖެ އައިސް އުޅެނީ އޭނާގެ އަނބިމީހާ އާއި އާއިލާ އާއި އެކުގައި ކަމަށާ، އެމީހުންގެ ހާލަތު މިވަގުތު ވަރަށް ނާޒުކު ކަމަށްވެސް އަސްލަމް ވިދާޅުވި އެވެ. 

މި މައްސަލަ އާއި ގުޅިގެން މައުލޫމާތު ދެއްވަމުން ފުލުހުންގެ މީޑިއާ އޮފިޝަލް "ވޮއިސް" އަށް ވިދާޅުވީ، ތުލުސްދޫ ގައި ސްނޯކްލިން އަށްގޮސް އޮތް ފަތުރުވެރިއެއް ގައިގައި އެ ސަރަހައްދުން ދަތުރުކުރި ޑިންގީއެއް ޖެހި ހާދިސާއެއް ހިނގާފައިވާ ކަމަށް މިއަދު 11:10 ހާއިރު ފުލުހުންނަށް ރިޕޯޓް ކޮށްފައިވާ ކަމަށެވެ. 

އަދި ތުލުސްދޫ ސިއްހީ މަރުކަޒަށް ގެންދިޔަ އިރު ވެސް އެމީހާ ނިޔާވެފައިވާ ކަމަށް ސިއްހީ މަރުކަޒުން މައުލޫމާތު ދީފައިވާ ކަމަށާ، ނިޔާވެފައި ވަނީ ޕޮލެންޑުގެ 52 އަހަރުގެ ފިރިހެނެއް ކަމަށްވެސް މީޑިއާ އޮފިޝަލް ވިދާޅުވި އެވެ. 

މި ހާދިސާ އާއި ގުޅިގެން އިތުރަށް ބަލަންޖެހޭ ކަންކަން ބަލަމުން އަންނަ ކަމަށްވެސް އޭނާ ވިދާޅުވި އެވެ.