އެމްޑީޕީ ފުވައްމުލަކު ރައީސްގެ މަގާމުގައި ހުރި މުޙައްމަދް ނިޒާމް ހަސަން އެ މަގާމުން އިސްތިއުފާ ދީ ޕާޓީ އިން ވަކިވުމަށް ފޯމު ހުށައަޅައިފިއެވެ.
އޭނާ މަޤާމުން އިސްތިއުފާ ދީ ލިޔެ ހުށައެޅި ސިޓީ އާއި އެކު އޭނާ ވަނީ ޓްވިޓާގައި އެކަން އިއްލާނުކޮށް ޓްވީޓް ކޮށްފައެވެ.
ނިޒާމް ވަނީ އޭނާ ޕާޓީއިން ވަކިވުމަށް އެދި ހުށައެޅި ސިޓީގެ ފޮޓޯއެއް ފޭސްބުކްގައި ހިއްސާ ކޮށްފައެވެ. އެގޮތުން އެސީޓީގައި ބުނެފައިވަނީ 2003 ވަނަ އަހަރުގެ އޮކްޓޯބަރު މަހުގެ 17 ވަނަ ދުވަހު ދިވެހިރާއްޖޭގައި ބޭއްވުނު ރިޔާސީ އިންތިޚާބުގައި، ފުވައްމުލަކު މާލެގަން އަވަށުގެ ރައްޔިތުން ވޯޓުލުމަށްޓަކައި ފުވައްމުލަކު ”މާލެގަމު މަރުކަޒު” ގައި ބެހެއްޓި ވޯޓް ފޮށި ކައިރީގައި އޮފިޝަލެއްގެ ގޮތުގައި މަސައްކަތް ކުރުމުގެ ފުރުޞަތު އޭނާއަށް ލިބުނުކަމަށާއި އެދުވަހު ބޭއްނު ރިޔާސީ އިންތިޚާބަކީ މިނިވަން އިންސާފުވެރި އިންތިޚާބެއް ކަމުގައި، އޭރު ދައުލަތުގެ އިދާރާތަކުން ކަނޑައެޅި ކަމުގައި ވިޔަސް، އެ އިންތިޚާބު ޞައްޙަ ވެ، އަދި އޭގެ މައްޗަށް އުފެދުނު ދިވެހި ވެރިކަން ޞައްޙަ ވާނޭ ހަމަ އެއްވެސް ގޮތެއް އޭނާއަށް ނުވިސްނުމުން، އެދުވަހުން ފެށިގެން އޭރުގެ ރައީސުލްޖުމްހޫރިއްޔާ މައުމޫން އަބްދުލް ގައްޔޫމާއި ދެކޮޅަށް ސިއްރާއި ފާޅުގައި އޭނާ ނިކުމެފައިވާނެކަމަށެވެ.
އަދި އެމްޑީޕީ އުފެއްދެވުމަށް ރައީސް ނަޝީދާއި އެމަނިކުފާނުގެ ބައިވެރިން ކުރެއްވި މަސައްކަތުގެ ތެރެއިން ރާއްޖެއިން ބޭރުގައި ޕާޓީ އުފެއްދި ދުވަހު އެ ޕާޓީގެ މެންބަރެއްގެ ގޮތުގައި އޭނާ ބައިވެރިވިކަމަށްވެސް ނިޒާމް ގެ ސިޓީގައި ބުނެފައިވެއެވެ.
ނިޒާމް ޕާޓީން ވަކިވުމަށް އެދި ހުށަހެޅު ފޯމުގެ ފޮޓޯއެއް އޭނާ ފޭސްބުކުގައި އާއްމުކޮށްފައިވާއިރު އެ ފޯމުގައި ޕާޓީން ވަކިވާ ސަބަބެއްކަމަށް ބުނެފައިވަނީ ސިޔާސީ ޕާޓީއެއްގެ ދަފުތަރުގައި އޭނާގެ ނަން އޮންނަން ބޭނުން ނުވާތީކަމަށެވެ.
މީގެއިތުރުން ނިޒާމް މަގާމުން ވަކިވިކަން އަންގާ ކުރި ޓްވީޓެއްގައި ވަނީ ޕާޓީގެ ރައީސް މުހައްމަދު ނަޝީދަށް ފޮނުއްވި ސިޓީއެއްގެ ސްކްރީން ޝޮޓްވެސް ހިމަނާފައެވެ.
ނިޒާމްއަކީ މިނިސްޓްރީ އޮފް އިކޮނޮމިކް ޑިވެލޮޕްމެންޓްގެ ސީނިއަރ އެގްޒެކެޓިވް ޑިރެކްޓަރެކެވެ. ފުވައްމުލަކުގައި ހުރެގެން ވަޒީފާ އަދާކުރާ ގޮތަށް ނިޒާމަށް އެ މަޤާމު ދީފައިވަނީ 2020 ވަނަ އަހަރުގެ މާޗު މަސް ތެރޭގައެވެ.
Advertisement
This content is created and paid for by advertisers and does not involve Voice Journalists
