ޤިޔާމަތް ދުވަހަށް ބިރުވެތި ވުމަށް ހޯމް މިނިސްޓަރު އަދި ޢަދާލަތު ޕާޓީގެ ރައީސް ޢިމްރާން އަށް އުނގޫފާރު ދާއިރާގެ މެންބަރު މުހައްމަދު ވަހީދު ނަސޭހަތްތެރިވެއްޖެއެވެ. 

ވައްޑެ މިފަދައިން އިމްރާނަށް ނަސޭހަތްތެރިވެފައި މިވަނީ، މަޖިލީހުގެ ރައީސް، މުހައްމަދު ނަޝީދު, "ފިކުރެއްގެ ދިރުން" ނަމުގައި އެމްޑީޕީގެ ތެރޭގައި ގޮތްޕެއް ހައްދަވާނެ ކަމަށް މިއަދު ވިދާޅުވެފައި ވަނިކޮށް، އެމަނިކުފާނު އިސްލާމް ދީނާ ދެކޮޅު ފިކުރުތައް މި ރާއްޖޭގައި ދިރުވަން އުޅުއްވާކަމަށް ދޭހަވާ ފަދަ މޭރުމަކުން އިމްރާން ޓްވީޓް ކުރެއްވުމާއި ގުޅިގެންނެވެ. 

އިމްރާންގެ ޓުވީޓަށް ރައްދު ދެއްވައި ވައްޑެ ކުރެއްވި ޓްވީޓެއްގައި އޭނާ ވަނީ ޢިމްރާން އަނެއްކާވެސް ދީނީ ކާޑު ކުޅުއްވަން ފެއްޓެވީތޯ ސުވާލު ކުރައްވާފަ އެވެ. 

Advertisement

"ޤިޔާމަތް ދުވަހަށް ބިރުވެތި ވުމަށް ނަސޭހަތްތެރިވަން" ވައްޑެ ވިދާޅުވި އެވެ.  

އެމްޑީޕީގެ ޕްރައިމަރީން ބަލިވިފަހުން ފުރަތަަމަ ފަހަރަށް އެމަނިކުފާނުގެ ކެންޕެއިން ޓީމާއި ބައްދަލު ކުރައްވައި ވާހަކަ ދައްކަވަމުން ރައީސް ނަޝީދު ވަނީ "ފިކުރެއްގެ ދިރުން" ނަމުގައި އެމްޑީޕީގެ ތެރޭގައި ގޮތްޕެއް ހެއްދެވުމަށް ނިންމަވާފައިވާ ކަމަށާ، އެކަން ނުހުއްޓުވޭނެ ކަމަށް ވިދާޅުވެފައެވެ. 

އެކަމާއި ގުޅިގެން ޢިމްރާން ކުރެއްވި ޓްވީޓެއްގައި އޭނާ ވަނީ، އެއްގޮތަކުން ނުވިއްޔާ އަނެއްގޮތަކުންވެސް ކަނޑައެޅިގެން އިސްލާމް ދީނާ ދެކޮޅު ފިކުރުތައް މި ރާއްޖޭގައި ދިރުވަން ދިވެހި ރައްޔިތުން ޖާގަ ނުދޭނެކަން އެނގި އިސްލާހުވެ ހެޔޮގޮތަށް ބަދަލުވާންވީ ވަގުތު އަދިވެސް ނުޖެހޭތޯ ސުވާލު ކުރައްވާފައެވެ.