ތިން ރަށެއްގައި އެއަރޕޯޓު އެޅުމަށް ބިންހިއްކުމަށް ބީލަން ހުށައަޅައިފިއެވެ.

މިނިސްޓްރީ އޮފް ޕްލޭނިންގ އެންޑް އިންފްރާސްޓްރަކްޗަރ އިން ބުނީ އަތޮޅުތަކުގައި ސަރުކާރުން އަލަށް ތަރައްޤީކުރުމަށް ހަމަޖެހިފައިވާ 4 އެއަރޕޯޓަށް ބޭނުންވާ ބިން ހިއްކުމަށް ހުޅުވާލި ފުރުސަތުގައި މިހާތަނަށް 3 އެއަރޕޯޓަކަށް ބޭނުންވާ ބިން ހިއްކުމަށް ބީލަން ހުށައަޅައިފައިވާ ކަމަށެވެ.

ފިނޭންސް މިނިސްޓްރީއިން ބިޑަށް ހުޅުވާލީ ހދ.މަކުނުދޫއާއި، ށ.ބިލެއްފައްސާއި ބ.ތުޅާދޫ އަދި ތ.ވިލުފުށީގެ އެއަރޕޯޓްގެ މަސައްކަތަށް ބޭނުންވާ ބިން ހިއްކުމަށެވެ.. ޕްލޭނިން މިނިސްޓްރީއިން ވިދާޅުވީ މި 4 ރަށުގެ ތެރެއިން 3 ރަށެއްގެ ބިން ހިއްކުން ކުރިއަށްގެންދިއުމަށް ޝައުގުވެރިކަން ފާޅުކޮށް 3 ފަރާތަކުން ބީލަން ހުށައަޅާފައިވާކަމަށެވެ. ލިބިފައިވާ ބީލަންތައް ބަލާ، އެކަށީގެންވާ ކުންފުންޏެއް ހޮވުމަށް ކުރިއަށްގެންދާ އިވަލުއޭޝަންގެ މަސައްކަތް ކުރިއަށްގެންދަނީ ފިނޭންސް މިނިސްޓްރީ އަދި ޕްލޭނިން މިނިސްޓްރީއާއި ގުޅިގެންކަމަށްވެސް ޕްލޭނިން މިނިސްޓްރީއިން ވިދާޅުވިއެވެ. ރެސްޓްރިކްޓެޑް ޓެންޑަރިންއަށް ކުރިއަށްގެންދިޔަ މި ބީލަމުގައި، ބީލަން ހުށައެޅޭނީ ކަނޑައެޅޭ ވަކި މިންގަނޑަކަށް ވަކި އަދަދެއްގެ ކުންފުންޏަށް ކަމަށެވެ.

ބިން ހިއްކާ ނިމުމާއެކު މި އެއަރޕޯޓްތަކުގެ ޢަމަލީ މަސައްކަތްތައް ވަރަށް އަވަހަށް ފެށިގެންދާނެކަން ސަރުކާރުކަން ހާމަކުރައްވައެވެ.

ބީލަމަށް ހުޅުވާލާފައިވާ މި 4 އެއަރޕޯޓާއެކު ޖުމްލަ 8 އެއަރޕޯޓް މުޅިން އަލަށް ސަރުކާރުން އަންނަނީ ތަރައްޤީކުރަމުންނެވެ.