ފެބްރުއަރީ މަހުގެ 4 ވަނަ ދުވަހު ފާހަގަކުރާ، ދުނިޔޭގެ ކެންސަރު ދުވަހާއި ގުޅިގެން ހާޢްސަ އޮންލައިން މައުލޫމާތު ސެޝަނެއްގައި ބައިވެރިވުމުގެ ފުރުސަތު އާއްމުންނަށް ހުޅުވާލައިފިއެވެ.

ފާޓިލިޓީ ސަޕޯޓް ކޮމިޔުނިޓީ އިން ބުނީ، މި ސެޝަންގައި މައިގަނޑުގޮތެއްގައި އަލިއަޅުވާލެވިގެންދާނީ، ކެންސަރާއި ގުޅުންހުރި ދަރިމައިވުމުގެ މައްސަލަތަކާއި، ފާޓިލިޓީ ޕްރިސަވޭޝަންގެ މައްޗަށް ކަމަށެވެ. 

އަދި މި ސެޝަންގައި ބައިވެރިންނަށް މައުލޫމާތު ދިނުމަށްޓަކައި ބައިވެރިވެޑައިގަންނަވާނީ އިންޑިއާގެ މިލާން ފަރޓިލިޓީ ހޮސްޕިޓަލް ގެ ކޮންސަލްޓަންޓް ރިޕްރޮޑަކްޓިވް މެޑިސިން އެންޑް ހައިރިސްކް އޮބްސްޓްރެޓިޝަން ޑރ.ޝިލްޕާ އެއްލޫރް އަދި އިންޑިއާގެ އެޗް.ސީ.ގީ ކެންސަރ ހޮސްޕިޓަލްގެ ކޮންސަލްޓަންޓް ގައިނިކް އޮންކޮލޮޖީ އެންޑް ރޮބޮޓިކް އެންޑް ލެޕްރޮޕްސްކޮޕިކް ސާޖަން ޑރ.އަބިލާޝާ ނަރާޔަން ކަމަށްވެސް ބުނެފައިވެއެވެ. 

Advertisement

ފާޓިލިޓީ ސްޕެޝަލިސްޓެއްގެ ގޮތުގައި ޑރ.ޝިލްޕާ މަސައްކަތްކުރައްވާތާ 13 އަހަރަށްވުރެ ގިނަވެފައިވާއިރު، އެސިސްޓެޑް ރިޕްރޮޑަކްޓިވް ޓެކްނޮލޮޖީގެ ސަބަބުން ދިމާވާ މައްސަލަތައް ހައްލުކުރުމާއި، ޕީސީއޯއެސް، ރިކަރަންޓް އިމްޕްލާންޓޭޝަން ފެއިލިއާ، ރިކަރަންޓް މިސްކެރީޖް އަދި ފިރިހެނުންގެ ދަރިމައިވުމުގެ މައްސަލަތަކާއި ގުޅޭ ކަންކަމަށް ޑރ. ޝިލްޕާ ހާއްސަކޮށް ބައްލަވައެވެ. 

މި ދާއިރާގައި 12 އަހަރުގެ ތަޖުރިބާ ހާސިލްކޮށްފައިވާ ޑރ. އަބިލާޝާ ހާއްސަވެފައިވަނީ، ގައިނެކް އޮންކޮލޮޖީ އާއި ސާރވިކަލް ކެންސާ އަދި އޯވޭރިއަން ކެންސާގެ ސާޖަރީތަކަށެވެ. 

ފެބްރުއަރީ މަހުގެ 4 ވަނަ ދުވަހުގެ ރޭ 21:00 ގައި ކުރިއަށްގެންދިއުމަށް ހަމަޖެހިފައިވާ މި ސެޝަންގައި ރަޖިސްޓްރީވުމަށް މިހާރުވަނީ ހުޅުވާލެވިފައެވެ. ސެޝަންގައި ބައިވެރިވެޑައިގަންނަވާ ފަރާތްތަކަށް ޑޮކްޓަރުންނާއި ސުވާލުކުރުމުގެ ފުރުސަތު ލިބިގެންދާނެ އެވެ.