މި އަހަރުގެ މާރިޗު މަހުތެރޭގައި އިދިކޮޅު އިއްތިހާދުގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ޖަލުން މިނިވަން ކުރެވޭނެ ކަމަށް ވަރަށް ބޮޑަށް އުއްމީދު ކުރައްވާ ކަމަށް އެމަނިކުފާނުގެ ގާނޫނީ ވަކީލުންގެ ޓީމުން ބުނެފިއެވެ. 

މި އަހަރު ސެޕްޓެމްބަރު މަހު ބާއްވާ ރިޔާސީ އިންތިޚާބުގައި ރައީސް ޔާމީނަށް ވާދަކުރެއްވޭނެތޯ ނޫސްވެރިއެއް ކުރެއްވި ސުވާލަށް ޖަވާބު ދެއްވަމުން އެމަނިކުފާނުގެ ގާނޫނީ ވަކީލުންގެ ޓީމުގައި ހިމެނިވަޑައިގަންނަވާ ޑރ. މުހައްމަދު ޖަމީލް އަހުމަދު ވިދާޅުވީ، ރައީސް ޔާމީން އަށް ރިޔާސީ އިންތިހާބުގައި ބައިވެރި ވެވޭނެތޯ ނުވަތަ ނޫންތޯ އަކީ ވަރަށް ގިނަ ދިވެހިންގެ ހިތުގައި އުފެދިފައިވާ ސުވާލެއް ކަމަށެވެ. 

ޖަމީލް ވިދާޅުވީ އިސްތިއުނާފީ މަރުހަލާ އަކީ ޓްރަޔަލް ކޯޓުގެ މަރުހަލާ ތަކާއި ތަފާތު މަރުހަލާ ތަކެއް ކަމަށެވެ. އެގޮތުން، މައްސަލަާއި ގުޅިގެން ހެކި ހުށަހަޅައި ހެއްކަށް ޖަވާބުދިނުން ފަދަ ގިނަ ވަގުތު ނަގާ ކަންކަން ޓްރަޔަލް ކޯޓުގެ މަރުހަލާގައި ކުރިއަށްދިޔަ ނަމަވެސް، އިސްތިއުނާފީ ކޯޓުގައި ކުރިއަށްދާ މައްސަލަ ތަށް މާ ދިގުލައިގެން ނުދާނެ ކަމަށެވެ. 

Advertisement

ޖަމީލް އިތުރަށް ވިދާޅުވީ، މައްސަލައި ކުރިއަށް ދިޔައިރުވެސް ގޮސްފައިވަނީ އެހެން މައްސަލަ ތަކާއި ވަރަށް ތަފާތުކޮށް ކަމަށާ، މައްސަލައިގެ ޝަރީއަތް ނިމުނު ރިޕޯޓުގައި ވެސް ވަރަށް ގިނަ އައު ވާހަކަތައް ހުރި ކަމަށެވެ. ކަންމިހެން ހުރި ނަމަވެސް، މައްސަލައިގެ އިސްތިއުނާފީ މަރުހަލާގައި ކާމިޔާބު ވާނެ ކަމަށާ، އަދި ރައީސް ޔާމީން މިނިވަންވާނެ ކަމުގެ ފުރިހަމަ ޔަގީންކަން އެބައޮތް ކަމަށް އޭނާ ވިދާޅުވި އެވެ. 

ވ. އާރަށުގެ މުއާމަލާތާއި ގުޅުވާ ރައީސް ޔާމީންގެ މައްޗަށް އުފުލާފައިވާ ދެ ދައުވާ އެމަނިކުފާނުގެ މައްޗަށް ސާބިތުވާކަމަށް ކަނޑައަޅާ 11 އަހަރުގެ ޖަލުހުކުމެއް ކްރިމިނަލް ކޯޓުން އިއްވާފައިވަނީ ނިމިދިޔަ ޑިސެމްބަރުމަހެ 25 ގައެވެ. އެ މައްސަލަ އިސްތިއުނާފް ކުރަން އެމަނިކުފާނުގެ ވަކީލުންގެ ޓީމުން އަންނަނީ ތައްޔާރުވަމުންނެވެ.