ވަކި މީހަކަށް ކާމިޔާބުވަންދެން އިންތިޚާބުތައް ބޭއްވުމަކީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ދެކޮޅު ހަދަމުން އައި ކަމެއް ކަމަށް މަޖިލީހުގެ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެ އެވެ. 

ރޮޒައިނާ މިފަދައިން ވިދާޅުވެފައިވަނީ އެމްޑީީޕީގެ ރިޔާސީ ޕްރައިމަރީގެ އިންތިޚާބު ގަނޑުބަޑުކޮށްފައިވާކަމަށް މި އިންތިޚާބުގައި ވާދަކުރެއްވި މަޖިލީހުގެ ރައީސް މުހައްމަދު ނަޝީދާއި އޭނާއަށް ތާއީދުކުރައްވާ މެމްބަރުން ތުހުމަތުކުރައްވަމުން ދާއިރު، މިއީ އެމްޑީޕީގެ އާދަޔާއި ޚިލާފު ކޮންގްރެސް ބާއްވަންޖެހޭ ވަގުތުކަން ފާހަގަކޮށް ނަޝީދުގެ ނުރަސްމީ އެކައުންޓުން ކުރި ޓްވީޓަކާއި ގުޅިގެންނެވެ. 

އެ ޓްވީޓުގައި އެމްޑީޕީގެ އާދަޔާއި ޚިލާފު ކޮންގްރެސްއަށް ގޮވާލެވޭ ގޮތް ކަނޑައަޅާފައިވާ މާއްދާތައްވެސް ހިއްސާކޮށްފައި ވެއެވެ. 

އެކަމާއި ގުޅޭގޮތުން ރޮޒައިނާ ވިދާޅުވީ އެމްޑީޕީގެ އާދަޔާއި ޚިލާފު ކޮންގްރެސްއަކަށް ގޮވާނީ އެމްޑީޕީގެ ގައުމީ މަޖިލީހުން ކަމަށެވެ. ގައުމީ މަޖިލީހުގެ މެޖޯރިޓީއަށް ޕާޓީގެ އަސާސީ ގަވައިދު ސާފުކޮށް އެނގިވަޑައިގަންނަވާ ކަމަށާއި އެފަދަ ކޮންގްރެސްއަކަށް ގޮވާލަން ޖެހޭފަދަ ހާލަތެއް އޮތްނަމަ ގައުމީ މަޖިލީހުން އެކަން ކުރައްވާނެކަމަށް ރޮޒައިނާ ވިދާޅުވިއެވެ. 

އެއާއެކު އޭނާ ވިދާޅުވީ އެމްޑީޕީގެ ރިޔާސީ ޕްރައިމަރީގެ އިންތިޚާބުގެ ތެރެއިން ކުރިއަށް އޮތް ރިޔާސީ އިންތިޚާބަށް އެމްޑީޕީއިން ނެރޭނެ ކެންޑިޑޭޓު ހޮވައިފިކަމަށެވެ. 

ވަކި ބޭފުޅަކަށް ކާމިޔާބުވަންދެން އިންތިޚާބު ބޭއްވުމަކީ އެމްޑީޕީއިން ދެކޮޅުހަދަމުން އައި ކަމެއްކަމަށާއި، ކުރިއަށް އޮތް ތަނުގައިވެސް އެކަމާއި އެ ޕާޓީއިން ދެކޮޅު ވާނެކަމަށް ރޮޒައިނާ ވަނީ ވިދާޅުވެފަ އެވެ. 

އެމްޑީޕީގެ ރިޔާސީ ޕްރައިމަރީގައި ޕާޓީގެ ދެ ރައީސުން ވާދަކުރައްވާފައިވާއިރު، ތަފާތު ބޮޑުކޮށް ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިހު ވަނީ ކާމިޔާބު ކުރައްވާފަ އެވެ. އެފަހުން ރައީސް ޞާލިހުވަނީ ގުޅިގެން މަސައްކަތް ކުރުމަށް ނަޝީދާއި އޭނާއަށް ތާއީދުކުރައްވާ ފަރާތްތަކަށް ގޮވާލައްވާފަ އެވެ. 

އެހެން ނަމަވެސް ނަޝީދު ވިދާޅުވަނީ ކުރިއަށް އޮތް ރިޔާސީ އިންތިޚާބު ރައީސް ޞާލިހާއެކު އެމްޑީޕީއަށް ކާމިޔާބު ނުކުރެވޭނެ ކަމަށެވެ. އަދި ޕާޓީގެ ތެރެއިން "ފިކުރެއްގެ ދިރުން" ނަމުގައި ގޮތްޕެއް އުފެއްދުމުގެ މަސައްކަތްޕުޅު އެމަނިކުފާނު ވަނީ ފައްޓަވާފައެވެ.

ނަޝީދުވަނީ އެ ގޮތްޕަށް ވީހާވެސް ގިނަ ބަޔަކު ގުޅުމަށް ގޮވާލައްވާފަ އެވެ.