އިންޑިޔާގެ ކޮޗިން އަށް ބޭސް ފަރުވާއަށް ގޮސްގެންއުޅުނު ކ ތުލުސްދޫ ފަރިޝްތާ، މުހައްމަދު މަހުދީ (35 އަހަރު) ފެނިއްޖެ ކަމަށް އޭނާގެ އާއިލާއިން ބުނެފިއެވެ.
ޖަނަވަރީ މަހުގެ 31 ވަނަ ދުވަހު އޭނާ ގެއްލިފައިވަނީ ކޮޗިންގައި ހުންނަ އަމްރިތާ ހޮސްޕިޓަލް ކައިރިން އެދުވަހުގެ 9:00 ހާއިރުއެވެ.
މަހުދީ އަކީ ބައިޕޯލާ ޑިސްއޯޑަރ ވަރަށް ބޮޑަށް ހުންނަ މީހެއް ކަމަށް އޭނާ ގެ އާއިލާއިން "ވޮއިސް" އަށް މައުލޫމާތު ދީފައިވެއެވެ. އަދި އޭނާ އިންޑިޔާ އަށް ގޮސްފައިވަނީ އެ ކަމަށް ފަރުވާ ހޯދުމަށް ކަމަށް ވެސް އާއިލާއިން ވަނީ ބުނެފައެވެ.
އެދުވަހު ހެނދުނު އަމްރިތާ ހޮސްޕިޓަލްގައި ހުންނަ ޑޮކްޓަރ އަށް ދެއްކުމަށް އޭނާ ގެންގޮސްފައިވާ ކަމަށާއި، ނަމަވެސް މަހުދީގެ ބަލީގެ ގޮތުން އޭނާ އަކީ ކުއްލި ކުއްލި އަށް ރުޅިއައިސް "ވައިލެންޓް" ކޮށް އުޅޭ މީހަކަށްވާއިރު، ޑޮކްޓަރ އަށް ދައްކަން ގޮސް އެތަނުގެ އެތެރޭގައި އެފަދަ ކަންކަން ހިނގާފައިވާ ކަމަށާ، އެއަށްފަހު ރުޅިއައިސް ހުރެ އޭނާ ހޮސްޕިޓަލުން ނުކުމެގެން ގޮސްފައިވާ ކަމަށް އާއިލާއިން ވަނީ ބުނެފައެވެ.
މަހުދީ ފެނުނުކަން ހާމަކޮށް އޭނާގެ އާއިލާއިން ހިއްސާކުރި ޕޯސްޓެއްގައިވަނީ މަހުދީ ފެނިއްޖެ ކަމަށާއި އޭނާ ފެނިފައިވަނީ އިންޑިޔާގެ ފުލުހުންނަށް ކަމަށެވެ. އަދި މަހުދީ ހޯދުމަށް މަސައްކަތް ކޮށްދެއްވި ހުރިހާ ފަރާތްތަކަށް ވަރަށް ބޮޑަށް ޝުކުރުވެރި ވާކަމަށްބެސް ބުނެފައިވެއެވެ.
Advertisement
This content is created and paid for by advertisers and does not involve Voice Journalists
