ކުޑަ ކުދިންނަށްވެސް ހަކުރުބަލި ޖެހޭ ކަމަށް ކުޑަ ކުދިންގެ ޚާއްސަ ޑޮކްޓަރ ޑޮކްޓަރ އަހްމަދު ފައިސަލް ވިދާޅުވެއްޖެއެވެ.

ޑޮކްޓަރ ފައިސަލް ކުރެއްވެވި ޓުވީޓުގައި ވިދާޅުވެފައިވަނީ ކުޑަ ކުދިން ޢާންމުކޮށް ފެންބޯވަރަށް ވުރެ ގިނައިން ފެންބޯނަމަ ހަކަރަށް ޓެސްޓުކޮށްލަން ވާނެ ކަމަށާއި، ކުޑަ ކުދިން ރޭގަނޑު ކުޑަކަމުދާން ގިނައިން ހޭލުމާއި ތަންމައްޗަށް ހީސްލެވުމަކީވެސް ހަކުރު ބަލީގެ ޢަލާމާތެއް ކަމަށެވެ.

ޑޮކްޓަރ ފައިސަލް އިތުރަށް ވިދާޅުވީ ކުއްޖާ ގެ ފަރުވާނުފެށި ކުއްޖާ ކޯމާއަށް ގޮސް އިންޓެންސިވް ކެއަރ ޔުނިޓް(އައިސީޔޫ) އަށް ލާ ވަރުވީމަ ޓެސްޓުކުރުން މާލަސްވާނެ ކަމަށެވެ.

ދިވެހިބަހުން ހަކުރު ބަލި ކިޔަނީ ޑައަބެޓީސް އަށެވެ. ޑައަބެޓީސް ޖެހެނީ، ހަށިގަނޑުން ފުދޭވަރަށް އިންސުލިން ނުއުފެއްދުމުންނެވެ. ނޫނީ އިންސުލިން ރަނގަޅަށް ބޭނުންކުރުމަށް ހުރަސް އެޅުމުންނެވެ. އެހެންވުމުން ވާގޮތަކީ، ލޭގައި ހަކުރުގެބައި ހުންނަން ކޮންމެހެންޖެހޭ މިންވަރަށް ހަކުރު ނުހުންނަނީ އެވެ.
އިންސުލިންއަކީ ހޯމޯނެކެވެ. އެއިންކުރާކަމަކީ، ކާއެއްޗެހީގައި އަދި ބޯއެއްޗެހީގައި ހުންނަ ކާބޯހައިޑްރޭޓްސް ހަކަތައަށް ބަދަލުކުރުމެވެ. ކާބޯހައިޑްރޭޓްގެ ތެރޭގައި ހަކުރާއި އޮލަ ހިމެނޭ (ތާނުގެ ބައި އެކުލެވޭ) ކާއެއްޗެހި ހިމެނެއެވެ.
ހަށިގަނޑަށް އެތެރެވާ ހަކުރުގެބައި ހަކަތައަށް ބަދަލުނުވެ ހަކުރުގެ ގޮތުގައި ހުރުމުން، ލޭ ހޮޅިތަކަށް ގެއްލުންލިބި ޞިއްޙީ މައްސަލަތައް މެދުވެރިވާން ފަށައެވެ.