ރާއްޖެ އިސްލާމް ވުމުގެ ކުރިން ދިވެހިން އަޅުކަންކޮށް އުޅުނު ބުދެއް ލ. ގަމުން ފެނިއްޖެއެވެ.

މޯލްޑިވްސް ހެރިޓޭޖް ސޮސައިޓީ ޖަމިއްޔާއިން ބުނީ، ރާއްޖެ އިސްލާމް ވުމުގެ ކުރިން ދިވެހިން އަޅުކަންކޮށް އުޅުނު ބުދެއް އިއްޔެ ލ. ގަމުން ފެނިފައިވާ ކަމަށެވެ. 

އެ ޖަމިއްޔާއިން އާއްމު ކޮށްފައިވާ ފޮޓޯ ތަކުން ފެންނަ ފެނުމަށް އެއީ ތަޅާލެވިފައިވާ ނުވަތަ ހަލާކު ކޮށްލެވިފައިވާ ބުދެއް ކަމަށް ބެލެވެއެވެ. އަދި އެ ބުދުގެ ފެނިފައިވަނީ ބޯ އެކަނި ކަމަށްވާއިރު އޭގެ ފުޅާމިނުގައި 7 އިންޗި އަދި ދިގުމިނުގައި 6 އިންޗި ހުރި ކަމަށް ހެރިޓޭޖް މިނިސްޓްރީން އާއްމު ކޮށްފައިވާ ފޮޓޯތަކުން ހާމަވެއެވެ. 

Advertisement

ހެރިޓޭޖް ސޮސައިޓީ ބުނެފައިވާ ގޮތުގައި، އެ ބުދު ފެނިފައިވަނީ ގަމުގައި ހައުސިން ޔުނިޓް އެޅުމަށް ވެލި ފޫންޏެއް ގޮތަށް ހުރި ތަނެއް ކޮންނަމުން ދަނިކޮށެވެ. 

ދިވެހިރާއްޖެ އިސްލާމްވީ މީގެ 869 ވަނަ އަހަރު ކުރިން މީލާދީ ގޮތުން 1153 ވަނަ އަހަރުގައެވެ. ދިވެހި ދައުލަތުގެ ދީނަކީ އިސްލާމް ދީން ކަމުގައި އޭރު ރާއްޖޭގެ ރަސްގެފާނަކަށް ހުންނެވި ދަރުމަވަންތަ ރަސްގެފާނު ކަނޑައެޅުއްވިއެވެ. އަދި ރާއްޖޭގެ ހުރިހާ ރަށެއްގެ މީހުން އިސްލާމް ދީނަށް ވަނުމަށް ދައުވަތު ދެއްވައި ބުދު ދީނުގެ އާސާރުތައް ވަނީ ނައްތާލާފައެވެ.