ވާދަވެރި ސިޔާސީ ލީޑަރު ރައީސް ޔާމީން އަބްދުލްގައްޔޫމު މިނިވަންކުރުމަށް ގޮވާލާ އިދިކޮޅުން މިރޭ ޕީޕީއެމް އޮފީސް ދޮރުމަތީގައި ކުރަމުންދިޔަ މުޒާހަރާ ކަވަރުކުރަން އުޅުނު ޗެނަލް-13 ގެ ކެމެރާމަން އަހުމަދު މިސްބާހަށް ފުލުހުންގެ ފަރާތުން ލިބުނު އަނިޔާތަކަށް އޭޑީކޭ ހޮސްޕިޓަލުގައި ފަރުވާދޭން ފަށައިފި އެވެ.
އިދިކޮޅުގެ މުޒާހަރާގެ މަންޒަރުތައް ކަވަރުކުރަމުން ދަނިކޮށް މިސްބާހުގެ ބޮލުގައި ފުލުހުން ވަނީ ޝީލްޑުން ޖަހާފައެވެ. އަދި އޭނާ ވެއްޓުނު ވަގުތު އުނގަނޑަށްވެސް އަނިޔާވެފައިވާކަމަށް މައުލޫމާތު ލިބެއެބެ.
ފުލުހުން ޗެނަލް-13 ގެ ކެމެރާމަނަށް އަނިޔާކޮށްފައިވަނީ މުޒާހަރާތައް ކަވަރުކުރުމަށް ބޭނުންކުރާ ނޫސްވެރިއެއްކަން އަންގައިދޭ ކާޑު ކަރުގައި އަޅާފައި އޮއްވާކަން ފާހަގަކޮށްލެވެ އެވެ.
އިދިކޮޅުގެ މުޒާހަރާ ކަވަރުކުރަމުން ދިޔަ ޗެނަލް-13 ގެ ކެމެރާމަނު މިސްބާހު ވެއްޓިފައި
ރައީސް ޔާމީން މިނިވަންކުރުމަށް ގޮވާލާ އިދިކޮޅުން މިރޭ މުޒާހަރާ ފެށިތާ ކުޑައިރުކޮޅެއްގެ ތެރޭގައި ފުލުހުން ވަނީ މުޒާހަރާއަށް ހުރަސްއަޅާފަ އެވެ.
އެގޮތުން ޕާޓީ އޮފީސް ސަރަހައްދަށް އެއްވެސް މީހަކަށް ނުވަދެވޭހެން ބެރިކޭޑުތައް ޖަހާ ފުލުހުން ވަނީ ބަންދުކޮށްފަ އެވެ. އަދި އިދިކޮޅުގެ މުޒާހަރާ ރޫޅާލުމަށް ފުލުހުން ވަނީ ހާލަތާއި ނުބައްދަލު ބާރުގެ ބޭނުންވެސް ކޮށްފަ އެވެ.
މިރޭ އިދިކޮޅުން ކުރިއަށް ގެންދިޔަ މުޒާހަރާ ކަވަރުކުރަމުން ދިޔަ ޗެނަލް-13 ގެ ކެމެރާމަނަށް ފުލުހުން ހުރަސްއަޅާ، އަނިޔާކޮށްފައިވާއިރު، ރިޔާސީ ބަޔާން އިއްވި ދުވަހު އިދިކޮޅުން ކުރި މުޒާހަރާ ކަވަރުކުރަމުން ދިޔަ ޗެނަލް-13 ގެ ނޫސްވެރިއަކަށްވެސް ފުލުހުން ވަނީ ބޮޑެތި އަނިޔާތަކެއް ދީފަ އެވެ.
ފުލުހުން ދިން އަނިޔާތަކަށް ފަރުވާ ހޯދުމަށް އެ ނުސްވެރިޔާ މީހާރު ވަނީ ރާއްޖެއިން ބޭރަށް ފުރުވާލާފަ އެވެ.
Advertisement
This content is created and paid for by advertisers and does not involve Voice Journalists
