މުޒާހަރާގައި ނޫސްވެރިންނަށް އަނިޔާވުމާ ގުޅިގެން މޯލްޑިވްސް ބްރޯޑްކާސްޓިންގް ކޮމިޝަނުން ކަންކަން މޮނިޓަރ ކުރަމުން ދާކަމަށް އެ ކޮމިޝަނުން ބުނެފިއެވެ.

މި އަހަރަށް ރައްޔިތުންގެ މަޖިލިސް ހުޅުވުމަށްޓަކައި ހޯމަ ދުވަހު ބޭއްވި ރަސްމިއްޔާތާ ދިމާކޮށް، މަޖިލިސް ކުރާގޭ ސަރަހައްދުގައި ބޭއްވި އެއްވުމެއް، ފުލުހުން ރޫޅާލުމުގެ ތެރޭގައި ބައެއް ނޫސްވެރިންނަށް އެކިވަރުގެ އަނިޔާ ލިބިފައި ވާތީ ބްރޮޑްކޮމްއިން ވަނީ ކަންބޮޑުވުން ފާޅުކޮށްފައެވެ.

މި އެއްވުން ކަވަރު ކުރަން އުޅުނު ބައެއް ނޫސްވެރިންނަށް އެ ފަރާތްތަކުގެ ޒިންމާ އެންމެ ފުރިހަމައަށް އަދާކުރުމަށް ބައެއް އާއްމުންގެ ފަރާތުން އެކިވަރުގެ ހުރަސްތައް ކުރިމަތިވެފަައި ވާތީ އެކަމަކީވެސް އެ ކޮމިޝަނުން ވަރަށް ކަންބޮޑުވާ ކަމެއް ކަމަށް ބްރޮޑްކޮމްގެ ސަރކިއުލާގައިވެއެވެ.

"މި ހިނގާދިޔަ ކަންތައްތަކާ ގުޅިގެން ކޮމިޝަނުން ދަނީ ހާއްސަ ސަމާލުކަމެއް ދީގެން މޮނިޓަރިންގެ މަސައްކަތްތައް ކުރަމުން" ބްރޮޑްކޮމްގެ ސާކިއުލާގައި ވެއެވެ.

މިފަދަ ކަންތައްތަކަށް ބޭނުންވާ ދާއިމީ ހައްލު ގެނައުމުގެ ގޮތުން ކަމާގުޅޭ ފަރާތްތަކާއެކު މަސައްކަތްތައް ކުރަމުންދާ ކަމަށާއި އެކި އެއްވުންތަކާއި މުޒާހަރާތައް ކަވަރު ކުރުމުގައި ހަރަކާތްތެރިވާ ނޫސްވެރިންނަށް ކުރިމަތިވާ ތަފާތު ހުރަސްތައް ނައްތާލައި ނޫސްވެރިންގެ ވާޖިބު އަދާކުރުމަށް ފުރިހަމަ ފަހި މާހައުލެއް ގާއިމުކޮށްދީ ރައްކާތެރިކަން ކަށަވަރު ކުރުމަށް ހުރިހާ ފަރާތްތަކަށް އިލްތިމާސްކުރާ ކަމަށް އެ ކޮމިޝަނުން ބުންޏެވެ.

އެއްވުންތަކާ މުޒާހަރާތައް ކަވަރު ކުރުމުގައި ހަރަކާތްތެރިވާ ނޫސްވެރިންނަށާއި މީޑިޔާގެ ފަރާތްތަކަކުން ގާނޫނާއި ގަވާއިދާ ނޫސްވެރިކަމުގެ ސުލޫކީ މިންގަނޑުގެ ތެރެއިން ހަރަކާތްތެރިވުމަށާއި ކަމާބެހޭ ފަރާތްތަކުގެ އިރުޝާދާ އެއްގޮތަށް އަމަލު ކުރުމަށްވެސް ބްރޮޑްކޮމްއިން ވަނީ އިލްތިމާސް ކޮށްފައެވެ.

އަދި އެ ކޮމިޝަނުން ދޫކުރާ "އެކްރެޑިޓޭޝަން ކާޑު" އަބަދުވެސް ފެންނަ ގޮތަށް ބޭނުން ކުރުމަށް ބްރޮޑްކޮމްއިން ވަނީ ނަސޭހަތްތެރިވެފައެވެ.