މިފަހުން ސަރުކާރާއި ވާދަވެރި ސިޔާސީ ޕާޓީއިން މާލޭަގައި ކުރި މުޒާހަރާތައް ކަވަރުކުރަމުން ދިޔަ ނޫސްވެރިންނަށް ފުލުހުން އަނިޔާކުރި މައްސަލަ ބޭރު ދުނިޔޭގެ ސަމާލުކަން ހޯދައިފި އެވެ. 

އެކަމާއި ގުޅޭގޮތުން ނޫސްވެރިންގެ ހައްގުތަކަށް ވަކާލާތު ކުރާ ބައިނަލްއަގްވާމީ ޖަމުއިއްޔާއެއްކަމަށްވާ ކޮމިޓީ ޓު ޕްރޮޓެކްޓް ޖާނަލިސްޓްސް (ސީޕީޖޭ) އިން ވަނީ ބަޔާނެއް ނެރެފައެވެ. 

އެ ބަޔާނުގައި އެ ޖަމުއިއްުޔާއިން ވަނީ މުޒާހަރާތައް ކަވަރުކުރަމުން ދިޔަ ނޫސްވެރިންނަށް ފުލުހުންގެ ފަރާތުން ދިން އަނިޔާތައް ކުށްވެރިކޮށްފަ އެވެ. 

Advertisement

ސީޕީޖީއިން ބުނީ މުޒާހަރާ ކަވަރުކުރަމުންދިޔަ ނޫސްވެރިންނަށް ފުލުހުން އަނިޔާކުރި މައްސަލަ ކަމާބެހޭ އިދާރާތަކުން ތަހުގީގުކުރަން ޖެހޭކަމަށެވެ. އަދި އެ މައްސަލަތައް ނޫސްވެރިންނަށް އަނިޔާކުރި ފުލުހުންނަށް ފިޔަވަޅު އެޅުމަށް އެ ޖަމުއިއްޔާއިން ވަނީ ގޮވާލާފަ އެވެ. 

މި މަހުގެ 6 ވަނަ ދުވަހު އިދިކޮޅުން މާލޭގައި ކުރި މުޒާހަރާ ކަވަރުކުރަމުންދިޔަ ޗެނަލް-13 ގެ ނޫސްވެރިއެއްގެ ބޮލުގައި ފުލުހުންގެ އޮފިޝަލަކު ޝީލްޑުން ޖެހުމުން އޭނާ އަށް ވަނީ ވަރަށް ބޮޑަށް އަނިޔާވެފަ އެވެ. މިވަގުތު އޭނާ އަށް ދަނީ ސްރީލަންކާގައި ފަރުވާދެމުން ނެވެ. 

އެފަހުންވެސް ޗެނަލް-13 ގެ ކެމެރާމަނަކަށް ފުލުހުންގެ ފަރާތުން ލިބުނު އަނިޔާތަކަށް ފަރުވާކުރުމަށްވެސް ހޮސްޕިޓަލުގައި އެޑްމިޓުކުރަން ޖެހުނެވެ. 

ޗެނަލް-13 ގެ ކެމެރާމަނު މިސްބާހު މުޒާހަރާތެރެއަށް ވެއްޓިފައި 

މުޒާހަރާތައް ކަވަރުކުރަން ނިކުންނަ ނޫސްވެރިންނަށް ފުލުހުން އަނިޔާކުރުން ކުށްވެރިކޮށް ބައިނަލްއަގްވާމީ ޖަމުއިއްޔާތަކުން ބަޔާންތައް ނެރެމުންދާއިރު، ނޫސްވެރިންގެ ހައްގުތައް ކަށަވަރުކޮށްދިނުމަށް ރާއްޖޭގައި ހެދިފައިވާ އެއްވެސް ޖަމުއިއްޔާއަކުން މިހާތަނަށް ފުލުހުންގެ އެ އަމަލުތައް ކޮށްވެރިކޮށްފަ އެއް ނުވެއެވެ. 

އެހެން ނަމަވެސް، ތަކުރާރުކޮށް ފުލުހުންގެ ފަރާތުން ނޫސްވެރިންނަށް އަނިޔާ ލިބެމުންދާކަން ފާހަގަކޮށް ބްރޯޑްކާސްޓިން ކޮމިޝަނާއި މޯލްޑިވްސް ޖާނަލިސްޓު އެސޯސިއޭޝަނުން ވަނީ "ކަންބޮޑުވުން" ފާޅުކޮށްފަ އެވެ.