17 އަހަރުން ދަށުގެ އިންޓަ ސްކޫލް ފުޓްބޯޅަ މުބާރާތުގެ ސެމީ ފައިނަލުގައި ކަލާފާނު ސްކޫލާ ދެކޮޅަށް ގުރައިދޫ ސުކޫލް ކުޅުނު މެޗުގައި ހިނގައިދިޔަ ހަމަނުޖެހުންތަކާއި ގުޅިގެން ގުރައިދޫ ސުކޫލުގެ ދަރިވަރުންނަށް ފުރައްސާރަ ކުރުމުގެ ސަބަބުން އެކުދިންނަށް ނަފްސާނީ ގޮތުން ބޮޑެތި ގެއްލުންތައް ލިބެމުންދާ ކަމަށް އެ ސުކޫލުން ބުނެފިއެވެ.
އެފްއޭއެމް އިންޓަ ސކޫލް 17 އަހަރުން ދަށުގެ ސެމީ ފައިނަލް ފުރަތަމަ މެޗުގައ ކަލާފާނު ސްކޫލުން 2-1 އިން ކ. ގުރައިދޫ ސްކޫލް ބަލިކުރި މެޗު ނިމުމާއެކު ގުރައިދޫ ސްކޫލުގެ ބައެއް ކުޅުންތެރިންނާއި އޮފިޝަލުން އަދި ސަޕޯޓަރުން ވެގެން ރެފްރީ އަށް ހަމަލާދީ މާރާމާރީ ހިންގާފައިވެއެވެ. މިއީ ދިވެހި ފުޓުބޯޅަ ތާރީހުގައި ވެސް އިންޓަސްކޫލް ފުޓުބޯޅަ މެޗެއްގައި މާރާމާރީއެއް ފެނިގެންދިޔަ ފުރަތަމަ ފަހަރެވެ.
އެކަމާއި ގުޅިގެން ގިނަ ބައެއްގެ ފާޑުކިޔުންތައް ގުރައިދޫ ސުކޫލަށް އަމާޒުވެފައިވަނިކޮށް، އެ ސުކޫލުން އިއްޔެ ނެރުނު ބަޔާނެއްގައި ވަނީ، އެ ސެމީ ފައިނަލް މެޗުގައި ހިނގައިދިޔަ އެއްވެސް ހަމަ ނުޖެހުމަކީ އެ ސުކޫލުން ތަރުހީބު ދޭ ކަމެއް ނޫން ކަމަށެވެ. އަދި އެ ސުކޫލަކީވެސް، ދަރިވަރުންނަށް ނޭދެވޭ އަމަލުތައް ކުރުމަށް ދަސްކޮށްދޭ އަދި އެކަންކަމަަށް ބާރުއަޅާ ހިޔާވައްސެއް ނޫން ކަމަށްވެސް ބުނެފައިވެއެވެ.
އެހެން ނަމަވެސް މެޗަށްފަހު ހިނގައިދިޔަ ކަންކަމާއި ގުޅިގެން ބައެއް ޚަބަރުފަތުރާ މީޑިއާ ތަކާއި، މީސްމީޑިއާގައި، އެ ހަމަނުޖެހުންތަކުގައި ބައިވެރި ނުވާ ދަރިވަރުންނާއި އޮފިޝަލުންގެ ފޮޓޯތަކާއި، ނަން ބޭނުންކޮށް ހަގީގަތާއި ޚިލާފް ދޮގު ވާހަކަތައް ފަތުރަމުންދާ ކަމަށާ، އެކަން ހަރުކަށި އިބާރާތުން ކުށްވެރި ކުރާ ކަމަށް އެ ސުކޫލުން ބުނެފައިވެއެވެ.
"މިކަމުގެ ސަބަބުން ކުދިންނަށް ނަފްސާނީ ގޮތުން ދަނީ ތަފާތު އެކި ގެއްލުންތައް ކުރިމަތި ވަމުންނެވެ. އެކި ފަރާތްތަކުން އެކުދިންނަށް ގުޅައި ދިމާކުރުމާއި، ކުދިންނަށް ތަފާތު ގޮތް ގޮތަށް ރައްދުވަމުންދާ ފުރައްސާރައިގެ ބަސްތައް ވަގުތުން ހުއްޓާލުމަށް ގޮވާލަމެވެ. ކަމުގެ ހަގީގަތް އޮޅޭގޮތަށް ޚަބަރުފަތުރަމުންދާ ނޫސްތަކާއި، ކުދިންނަށް ފުރައްސާރަ ކުރާ އެންމެހައި ފަރާތްތަކަށް ކަމާއި ބެހޭ އިދާރާތަކުން ފިޔަވަޅު އެޅުމަށް ވެސް ގޮވާލަމެވެ." ގުރައިދޫ ސްކޫލް ގެ ބަޔާނުގައި ވެއެވެ.
17 އަހަރުން ދަށުގެ އިންޓަ ސްކޫލް ފުޓްބޯޅަ މުބާރާތުގެ ސެމީ ފައިނަލުގައި ކަލާފާނު ސްކޫލާ ދެކޮޅަށް ކުޅުނު މެޗުގައި ހިނގައިދިޔަ ހަމަނުޖެހުންތަކާއި ގުޅިގެން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ރާވާ ހިންގާ މުބާރާތްތަކުން ކ. ގުރައިދޫ ސްކޫލް ވަނީ އެއް އަހަރަށް ސަސްޕެންޑްކޮށްފައެވެ.
މީގެއިތުރުން އެފްއޭއެމުން ވަނީ އެ މެޗުގައި ހަމަނުޖެހުން ހިންގުމުގައި ހަރަކާތްތެރިވި ގުރައިދޫ ސްކޫލުގެ ތިން ކުޅުންތެރިއަކު ވެސް ސަސްޕެންޑުކޮށްފައެވެ. މި ތިން ކުޅުންތެރިންނަށް ކުރިޔަށް އޮތް ދެ އަހަރަށް އެފްއޭއެމުން ރާވާ ހިންގާ އެއްވެސް މުބާރާތެއްގައި ކުޅުން މަނާވާނެ އެވެ. އަދި އެފްއޭއެމުގެ މުބާރާތެއްގައި ގުރައިދޫ ސްކޫލް ތަމްސީލުކުރާ ހާލަތެއްގައި 10 މެޗު ހަމަވަންދެން އެ ސްކޫލުގެ އެއްވެސް ސަޕޯޓަރަކު މެޗު ކުޅޭ ސަރަހައްދަށް ނުވަދެވޭ ގޮތަށް އެ އެސޯސިއޭޝަނުން ވަނީ ނިންމާފައެވެ.
Advertisement
This content is created and paid for by advertisers and does not involve Voice Journalists
