ކަމިޝަނާ އޮފް ޕޮލިސް މުހައްމަދު ހަމީދުގެ އޯޑަރަށް ތަބާވުމުގެ ކުރިން ފުލުހުންގެ އިދާރާއިން އޭނާކުރި ވައްކަންތަކުގެ ވާހަކަ ފުލުހުން ހޯދާ އޮޅުންފިލުވަން ޖެހޭކަމަށް އިދިކޮޅު އިއްތިހާދުގައި ހިމެނޭ ޕީއެންސީގެ ރައީސް އަބްދުއްރަހީމް އަބްދުالله (އަދުރޭ) ވިދާޅުވެއްޖެ އެވެ. 

ޕީޕީއެމް އޮފީސް ދޮރުމަތީގައި އޮތް ޖަލްސާއެއްގައި ވާހަކަދައްކަވަމުން އަދުރޭ ވިދާޅުވީ، ފުލުހުންގެ އިސް ވެރިއެއްގެ ގޮތުގައި މިއަދު ހުންނެވި ހަމީދަކީ މީގެ ކުރިން ފުލުހުންގެ ސިއްރު މައުލޫމާތުތަކެއް ލީކުކޮށްލައިގެން އެ އިދާރާއިން ކަނޑާލާފައި ހުރި މީހެއްކަމަށެވެ. އޭނާ އަކީ ގައުމަށް ގައްދާރުވެފައިވާ މީހެއްކަމަށް އަބްދުއްރަހީމް ވަނީ ވިދާޅުވެފަ އެވެ. 

އަބްދުއްރަހީމް ވިދާޅުވީ ހަމީދުގެ އެއްވެސް އޯޑަރަކަށް ތަބާވުމުގެ ކުރިން އޭނާ ފުލުހުންގެ އިދާރާގައި ހުރެގެން ހިންގި ވައްކަންތަކުގެ ވާހަކަ ދިވެހި ފުލުހުން އޮޅުންފިލުވަން ޖެހޭކަމަށެވެ. 

އަބްދުއްރަހީމް ވިދާޅުވީ ދެން އަންނަ ޕީޕީއެމްގެ ވެރިކަމެއްގައި ހަމީދަށް ފުލުހުންގެ އިދާރާގައި ނުހުރެވޭނެ ކަމަށެވެ. ފުލުހުންގެ މުއައްސަސާއަކީ ރައްޔިތުންގެ ލޯބި ލިބޭ ގަދަރުވެރި ތަނަކަށް ހެދޭނީ އެ މުއައްސަސާއަށް ޚިޔާނާތްތެރިވި މީހުން ބޭރުކޮށްގެންކަން އޭނާ ފާހަގަކުރެއްވި އެވެ. 

އެއާއެކު އަބްދުއްރަހީމް ވަނީ ގައުމު އިސްލާހުކުރުމަށް އިދިކޮޅުން ކުރަމުން ދާ މަސައްކަތްތަކާއި ފުލުހުންވެސް ގުޅިވަޑައިގަތުމަށް ގޮވާލާފަ އެވެ.