ރަސޫލާ ޞައްލައްالله ޢަލައިހި ވަސައްލަމް ނަބީކަމައިގެން ވަޑައިގަތުމުގެ ކުރިން ސުރެ މައްކާގެ އަހުލުވެރިން ބޭނުން ކުރަމުން ދިޔަ "ސޫޤް އަލްހަބަޝާ" ހިންގަމުންދިޔަ ތަން ސަޢޫދީޢަރަބިއްޔާގެ ސައިންސްވެރިންތަކެއް ހޯދައފިއެވެ.

ރަސޫލާ ޞައްލައްالله ޢަލައިހި ވަސައްލަމް އިސްލާމް ދީނަށް ގޮވާލެއްވުމުގެ މަސައްކަތައް ފެއްޓެވުމުގެ މާކުރިން "ސޫޤް އަލްހަބަޝާ" ބޭނުން ކުރެވެމުންދިޔައެވެ. އަދި އިސްލާމް ދީނުގެ ކުރީ ކޮޅުގައިވެސް މިތަން ދިޔައީ ބޭނުން ކުރެވެމުންނެވެ.

"ސޫޤް އަލްހަބަޝާ" ހޯދިފައިމިވަނީ ކިންގް ޢަބްދުލް ޢަޒީޒް ފައުންޑޭޝަން ފޯ ރިސަރޗް އެންޑް  އާކައިވްސް އާއި ސަޢުދީގެ މިނިސްޓްރީ އޮފް ކަލްޗަރ އަދި ހެރިޓޭޖް ކޮމިޝަނާއި ގުޅިގެން ހިންގި މަސައްކަތެއްގެ ތެރެއިންނެވެ.

ސޫޤް އަލްހަބަޝާ އަކީ އެތަކެއް ޒަމާނެއް ވެފައި ހުރި ތަނެކެވެ. އޭރު އެޒަމާނުގައި އެތަނަކީ މޫސުމީ ބާޒާރެއްގެ ގޮތުގައި ބޭނުން ކުރެވުނު ތަނެކެވެ.

ރަސޫލާ ޞައްލައްالله ޢަލައިހި ވަސައްލަމް ޙަދީޖާ ރަޟިޔަالله ޢަންހާގެ މުދާ ހިއްޕަވައިގެން ވިޔަފާރި ކުރައްވަން ވަޑައިގެންނެވީ މި ސޫޤަށެވެ. ސޫޤް އަލްހަބަޝާއަކީ ތިހާމާ ރީޖަން ގައި އޮންނަ އެންމެ ބޮޑު އެއް މާރކެޓެވެ. ކޮންމެ އަހަރަކުވެސް ރަޖަބް މަހުގެ ފުރަތަމަ 8 ދުވަހު މި މަރކެޓް ދިޔައީ ބާއްވަމުންނެވެ. ހިޖުރައިން 197 ވަނަ އަހަރާއި ހަމައަށް މި ސޫޤް ކުރިއަށް ގެންދިޔައެވެ.

"މިފަދަ ތާރީޚީ މައުލޫމާތު އެއްކޮށް ހަދަންވަނީ ކަނޑައެޅިފައި އޮންނަ ޚާއްސަ މެތަޑޮލޮޖީއެއްގެ ދަށުން، އެހެންކަމުން މި ޑިޕާޓްމެންޓުން ވާނީ މީގެ ކުރިންވެސް މިފަދަ މަސައްކަތްތައްކޮށް ތަޖުރިބާހޯދާފައި، އެގޮތުން އުކާޒް ބާޒާރުގެ މައުލޫމާތު ތައް އެއްކޮށްވެސް ހެދުނު، އަދި މީގެ އިތުރުން ރަސޫލާ ޞައްލައްالله ޢަލައިހި ވަސައްލަމްގެ ސިޔަރަތުގައި ބަޔާންވެގެންވި ބައެއް އެހެން ތަންތަން ވެސް ހޯދައި އެތަންތަނާއި ބެހޭ މައުލޫމާތު ވާނީ ޑޮކިޔުމެންޓް ކުރެވިފަ" މި މަސައްކަތުގައި ބައިވެރިވި ފަހްދް އަލް ސަމާރީ ވިދާޅުވިއެވެ.

"ގިނަ ބައެއްގެ ބައިވެރިވުމާއި އެކު ކުރެވުނު މި މަސައްކަތުން މިވަނީ ސޫޤް އަލްހަބަޝާ ހޯދިފައި، މިއީ އެއްބައިވަންތަ ކަމާއި އެކު މަސައްކަތް ކުރުމުން ކާމިޔާބު ވާނެ ކަމުގެ މިސާލެއް، މިމަސައްކަތުގައި ތާރީޚް ޢިލްމުވެރިން، ދިރާސާކުރާ މީހުން، ޖޯގްރަފީޢިލްމުވެރިން ގެ އިތުރުން ރަސޫލާ ޞައްލައްالله ޢަލައިހި ވަސައްލަމްގެ ސިޔަރަތުގެ ޢިލްމުވެރިން ވެސް ބައިވެރިވެފައި، ކޮންމެ ބޭފުޅަކީވެސް ސައިޓާއި ގުޅުން ހުރި އައުއެއްޗެއް ބުނެދެއްވައި މިއީ ސީދާ އެތަންކަން ދެނެގަތުމަށް އެހީވެދެވޭނެ ބޭފުޅެއް" ޓީމުގެ މެމްބަރެއް ކަމަށްވާ އަބްދުالله އަލްޒަހްރާނީ ވިދާޅުވިއެވެ.

ސޫޤ އަލް ހަބަޝާ ހޯދުމަށް އެކި ފަހަރު މަތިން ސައިންޓިސްޓުން މަސައްކަތްކުރަމުން ގެންދާތާ 40 އަހަރަށް ވުރެ ގިނަ ދުވަސް ވެއްޖެއެވެ.

ތާރީޚީ މިފަދަ މާރކެޓްތައް ހުރީ ގަސްގިނަ، ވޯޓަރފޯލް ފަދަ ތަންތަނާއި ކައިރީގައެވެ. ސޫޤް އަލް ހަބަޝާ އޮންނަނީ އަރްދިޔާތްގެ ވާދީ ޤަނޫނާގެ ދެކުނު އައްސޭރީގައެވެ. އެއީ މައްކާގެ ކޯސްޓަލް ސިޓީ އެކެވެ.