ރާއްޖޭގައި 5 އަހަރާއި 11 އަހަރާއި ދެމެދުގެ ކުދިންނަށް ކޮވިޑް19 އިން ދިފާއު ވުމަށް ދޭ ވެކްސިން ދޭން ފަށައިފިއެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ހާމަކޮށްފައިވާ ގޮތުން ކޮވިޑް-19 އިން ރައްކާތެރިވުމަށް އުމުރުން 5 އަހަރާއި 11 އަހަރާ ދެމެދުގެ ކުދިންނަށް ދެވޭ ފައިޒަރ ވެކްސިން ރާއްޖެއަށް މިހާރު ލިބިފައިވާ ކަމަށެވެ.

އެ އެޖެންސީން ވިދާޅުވީ  އެ އުމުރުގެ ކުދިންނަށް ވެކްސިން ދިނުމަށް މޯލްޑިވްސް ޓެކްނިކަލް އެޑްވައިޒަރީ ގްރޫޕު އިން އިމިއުނައިޒޭޝަނުން ލަފާދީފައިވާކަމަށާއި މިއަދުން ފެށިގެން އުމުރުން 5 އަހަރާއި 11 އަހަރާ ދެމެދުގެ ކުދިންނަށް ފައިޒަރ ވެކްސިން ދިނުމަށް ހުޅުވާލާފައިވާކަމަށެވެ.

މާލޭގެ ވެކްސިން ސެންޓަރުތަކުގެ އިތުރުން އަތޮޅުތެރޭގެ ހޮސްޕިޓަލް އަދި ހެލްތް ސެންޓަރުތަކުން ފައިޒަރ ވެކްސިން ލިބެން ހުންނާނެއެވެ. އެގޮތުން މާލެއިން ވެކްސިން ލިބެންހުންނާނީ އައިޖީއެމްއެޗުން ކޮންމެ އާދިއްތަ ދުވަހެއްގެ 9:00 އިން 12:00 އަށް, ހުޅުމާލެ ހޮސްޕިޓަލުން ކޮންމެ އާދީއްތަ، އަންގާރަ އަދި ބުރާސްފަތި ދުވަހެއްގެ 13:00 އިން 14:00 އަށް އަދި ދަމަނަވެށިން ސަރުކާރު ބަންދު ނޫން ކޮންމެ ދުވަހެއްގެ 13:30 އިން 15:00 އަށެވެ.

މީގެއިތުރުން އުމުރުން 12 އަހަރުން މަތީގެ އުމުރުފުރާގެ ކުދިންނަށްވެސް ފައިޒަރ ވެކްސިން މިހާރު ލިބެން ހުންނާނެކަމަށް އެޗްޕީއޭއިން ވިދާޅުވެފައިވެއެވެ. އެ އެޖެންސީން ވަނީ ފައިޒަރ ވެކްސިންގެ ޑޯޒުތައް އަދި ބޫސްޓަރ ޑޯޒް ފުރިހަމަ ނުކުރާ ފަރާތްތަކުން ވެކްސިން ޖެހުމަށް އަންގާފައެވެ.