އަނެއްކާވެސް މާލޭގައި ތޫނު އެއްޗަކުން ހަމަލާދީ މީހަކު ޒަހަމްކޮށްލައިފިއެވެ. 

ފުލުހުންގެ މީޑިއާ އޮފިޝަލް ވިދާޅުވީ ވިލިމާލޭ ފެރީ ޓާމިނަލް ކައިރިން މީހަކަށް ތޫނު އެއްޗަކުން ހަމަލާ ދީފައިވާ ކަމުގެ ރިޕޯޓް މިއަދު 15:30 ކަންހާއިރު ފުލުހުންނަށް ލިބިފައިވާ ކަމަށެވެ.

އަނިޔާވި މީހާއަށް އޭޑީކޭ ހޮސްޕިޓަލްގައި ދަނީ ފަރުވާ ދެމުން ކަމަށް މީޑިއާ އޮފިޝަލް ވިދާޅުވިއެވެ.

Advertisement

ފުލުހުން އިތުރަށް ވިދާޅުވީ އެއިދާރާއިން ދަނީ މައްސަލަ އިތުރަށް ތަހްގީގު ކުރަމުން ކަމަށެވެ.

މައުލޫމާތު ލިބިފައިވާ ގޮތުގައި މި ހާދިސާގައި އަނިޔާވެފައިވަނީ ފިރިހެނަކަށެވެ. އަދި އޭނާ އަށް ހަމަލާދީފައިވަނީ ގުރޫޕަކުން ކަމަށްވާއިރު އެ ގުރޫޕުން އޭނާއަށް ހަމަލާދިނީ، ހަމަލާދޭން އުޅެން ފެށުމުން ވިލިމާލޭ ފެރީ ޓާމިނަލްގެ ތެރެއަށް ވަންނަން އުޅެނިކޮށެވެ.

މިމަހު 12 ވަނަ ދުވަހުގެ ރޭ ދަންވަރުވެސް ތޫނުއެއްޗަކުން ހަމަލާދީ މީހަކު ވަނީ ޒަޚަމްކޮށްލާފައެވެ. އެ މައްސަލަ އާއި ގުޅިގެން އެއްވެސް މީހަކު މިހާތަނަށް ހައްޔަރު ކުރިކަން ފުލުހުން ހާމަކޮށްފައެއް ނުވެއެވެ.