ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތޯރިގު (ޓޮމް) ގެ ބައްޕަ، ވަގަށް ވެރިކަން ކުރާ ކޯލިޝަންގައި ހިމެނޭ އަދާލަތު ޕާޓީއަށް ވެއްދި މައްސަލައެއް ފެންމަތިވެއްޖެ އެވެ.
ޓޮމްގެ ބައްޕަގެ 2021 ވަނަ އަހަރު އަދާލަތު ޕާޓީއަށް ވައްދާފައިވާކަން އެގޭ ލިޔުންތަކާއިއެކު ކޮށްފައިވާ ޓުވީޓެއްގައި ބުނީ، އޭނާގެ ބައްޕަ، އދ.މަހިބަދޫ، ކަންމަތީގެ، އިބްރާހިމް އާދަމްގެ އެއްވެސް ހުއްދައަކާއި ނުލައި އަދާލަތު ޕާޓީއަށް ވައްދާފައިވާތީ އެ މައްސަލަ ބަލައިދޭން އޭނާގެ ބައްޕަ މިހާރު ކަމާއިބެހޭ ފަރާތްތަކަށް ހުށަހަޅާފައިވާކަމަށެވެ.
އަދި އޭނާގެ ބައްޕަ އެ ޕާޓީއަށް ވައްދަން ލާފައިވާ ފޯމުގައި ސޮއިކުރި މީހަކު ހޯދައި އަޅަންޖެހޭ ފިޔަވަޅު އަޅާނެކަމަށްވެސް ވިދާޅުވިއެވެ.
އަދާލަތު ޕާޓީއަށް އޮޅުވާލައިގެން ޕީޕީއެމް މެންބަރުން ތަކެއް ވައްދާފައިވާ މައްސަލަ ތަކެއްވެސް މީގެ ކުރިން ވަނީ ފެންމަތިވެފައެވެ. އެކަމާއި ގުޅިގެން ޕީޕީއެމްގެ މެންބަރުން ނުރުހުންފާޅުކޮށްފައިވާއިރު އަދާލަތުން ބުނަނީ އޮޅުވާލައިގެން ޕާޓީއަށް މެންބަރުން ނުވައްދާ ކަމަށެވެ.
ވަގަށް ޕާޓީތަކަށް ވައްދާ މައްސަލަ ހައްލު ކުރުމަށް އިލެކްޝަންސް އިން މިހާރު ވަނީ ވަރުގަދަ ފިޔަވަޅު ތަކެއްވެސް އަޅާފައެވެ. އެގޮތުން ސިޔާސީ ޕާޓީތަކަށް ވަންނަން އެދި ޕާޓީތަކުން ހުށަހަޅާ ފޯމްގެ ސައްހަކަން އިތުރަށް ކަށަވަރު ކުރުމަށް ފޯމްގައިވާ ފޯން ނަމްބަަރަށް އެސްއެމްއެސް ކުރުމާ އީސީގެ ވެބްސައިޓްގައި ފޯމްގެ މައުލޫމާތު ހިމަނައި ޝަކުވާ ހުށަހެޅުމަށް 7 ދުވަސް ދޭ ގޮތަށްވެސް މިހާރު ވަނީ ހަދާފައެވެ.
އެއާއެކު، ޕާޓީތަކުން ލިބޭ މެމްބަރޝިޕް ފޯމްގެ އަދަދު ބޮޑުތަނުން ކުޑަވެފައިވާކަންވެސް އީސީން ވަނީ ހާމަކޮށްފަ އެވެ.
Advertisement
This content is created and paid for by advertisers and does not involve Voice Journalists
