ސޮނީ ސްޕޯޓްސް ގޯލްޑަން ފުޓްސަލް ޗެލެންޖްގައި ރޭ އަލިފުށި 3-0 ގެ ނަތީއްޖާއަކުން ބަލިކޮށް، ބާކީ އެއްމެޗު އޮއްވާ އިނގުރައިދޫ އިން އަތޮޅު ފައިނަލުގެ ފުރަތަމަ ޖާގަ ކަށަވަރުކޮށްފިއެވެ.

ރޭގެ މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެން ގޮސްފައިވާ އިރު މި ހާފުގައި ދެޓީމުންކުރެ އެއްވެސް ޓީމަކަށް ގޯލެއް ކާމިޔާބުކުރެވިފައެއް ނުވެއެވެ. ނަމަވެސް މެޗުގެ ދެވަނަ ހާފުގައި އިގުރައިދޫ ޓީމުން ވަނީ އެޓީމުގެ އެޓޭކުތައް ވަރުގަދަކޮށް އަލިފުށީގެ ގޯލަށް ގިނަ ހަމަލާތަކެއް ފޮނުވާލާފައެވެ.

ރޭގެ މެޗުގައި އިގުރައިދޫ ޓިމަށް ލީޑު ހޯދައިދިނީ މި މުބާރާތުގައި މޮޅުކުޅުމެއް ދައްކަމުން އަންނަ މުހައްމަދު މަމްދޫހް އެވެ. އަދި އެޓީމުގެ ދެވަނަ ލަނޑު ކެޕްޓަން އަލީ ހާފިޒް ކާމިޔާބުކޮށްދިން އިރު އިގުރައިދޫގެ ތިންވަނަ ލަނޑު ކާމިޔާބުކޮށްދިނީ ވެސް ފުރަތަމަ ލަނޑު ކާމިޔާބުކޮށްދިން މަމްދޫހް އެވެ.

ފަސް ޓީމު ވާދަކުރާ ރ. އަތޮޅުގެ ލީގު ބުރުގެ އެއް ވަނައިގައި އިނގުރައިދޫ އޮތީ ކުޅުނު ތިން މެޗުން ވެސް މޮޅުވެ ނުވަ ޕޮއިންޓާ އެކު އެވެ. ދެ ވަނައިގައި ދުވާފަރު ހަ ޕޮއިންޓާ އެކު އޮތްއިރު، ތިން ވަނައިގައި އޮތީ ތިން ޕޮއިންޓާ އެކު އަލިފުށްޓެވެ. އިންނަމާދޫ އަށް އަދި ޕޮއިންޓެއް ނުލިބެ އެވެ. މި ގްރޫޕްގައި އަދި ދުވާފަރާއި އިނގުރައިދޫގެ މެޗާއި ދުވާފަރާއި އަލިފުށި ކުޅޭ މެޗު ވެސް އެބައޮތެވެ. ގުރޫޕް ސްޓޭޖް ފަހު މެޗުގައި ދުވާފަރު ފުޓްސަލް ޓީމާއި ދެކޮޅަށް އިގުރައިދޫ ނުކުންނާނީ ފެބުރުއަރީ މަހުގެ 25 ވަނަ ދުވަހުގައެވެ.